PDHJ Sorumutu ho Instituisaun 5 Prevene VDH no BG

Dili : Provedor Direitus Umanus no Justisa, Dr. Silvério Pinto Baptista konvoka sorumutu ho instituisaun 5 ne’ebé kompustu husi Comisaun Nasional Eleisaun (CNE), Secretariadu Tekniku Administrasaun Eleitoral (STAE), Polisia Nasional Timor-Leste (PNTL), Komisaun Anti Korrupsaun (KAK), Komisaun Nasional Direitu Labarik no Inspesaun Jeral Estadu (IJE) hodi prepara programa prevensaun, interligadu ho direitus umanus no boa governasaun iha tempu eleisaun antisipada.

Provedor hateten, objetivu husi sorumutu ne’e atu akumula hanoin oinsa haforsa servisu iha baze halo monitorizasaun kona-ba direitus umanus no boa governasaun.

Nia informa, liu husi sorumutu ne’e instituisaun lima ne’e konkorda atu ida-idak halo sosializasaun bazeia ba ida-idak nia kna’ar maibé koopera ba malu. Nia fo ezemplu, PDHJ sei informa kona-ba asuntu direitus umanus, fo hatene ba komunidade ne’ebé priense ona idade vota nian, iha livre no seguru atu ezerse nia votu politiku sein intimidasaun husi forsa politiku sira. nune’e mos ligadu ho asuntu boa governasaun, nia dehan.

PDHJ sei informa ba partidu politiku konkorente sira atu la bele privatiza patrimonio estadu iha tempu kampaña tanba ne’e viola regras.

“Partidu konkorente sira tenke uza sira nia rekursu rasik, labele uza fali patrimonio estadu hanesan kareta no proibidu uza edifisiu públiku ba interese partidu durante kampaña,” nia dehan.

Enkuantu KNDL, Provedor dehan, sei sosializa ba komunidade no partidu sira atu labele uteliza labarik sai hanesan instrumentu politiku iha tempu kampaña.

Konaba KAK, CNE, STAE no PNTL, nia afirma sei hala’o sira nia knar tuir lei haruka, no PDHJ sei nafatin kria koordenasaun ne’ebé diak.