• Prevene no Kombate Korupsaun hodi Promove Governasaun Di’ak no Proteje Direitus Umanus iha servisu Administrasaun publika

    Dili : Iha loron 28 Fevereiru 2018, Instituisaun hat (4) ne’ebé kompostu husi Provedoria dos Direitos Humanos e Justiça (PDHJ), Komisaun Anti Korupsaun (KAK), Inspesaun Jeral Estadu (IJE) no Komisaun Funsaun Publika (KFP) realiza workshop ba funsionariu públiku iha Ministério Planu no Finansas (MPF) ho tema “Prevene no kombate korupsaun hodi promove governasaun di’ak no proteje direitus umanus iha servisu administrasaun publika nian”.

    Objetivu husi desiminasaun informasaun husi instituisaun hirak ne’e mak atu hasa’e prestasaun servisu, responsabilidade, disiplina, integridade no dezeña sira nia funsaun ho lo’os no mós kontrolu ho efikásia no efisiênsia husi funsionárius públikus.

    Provedor Dr. Silvério Pinto Baptista, iha sesaun aprezentasaun materia kona-ba kna’ar Provedoria no direitus umanus nian, husu ba funsionáriu públikus sira tantu kargu Diretor Jerais, Diretor Nasionais no Xefi Departamentus sira iha Ministério Planu no Finansas atu servisu ho responsabilidade, tanba instituisaun  Provedoria hanesan instituisaun ne’ebé kontrola ba atividades husi governantes sira nian.

    Provedor esplika tan katak, mandatu husi Provedoria mak atu proteje no promove direitus humanus no promove boa governasaun, no ho nia natureza servisu atu fiskaliza no advokasia, promosaun no edukasaun no halo investigasaun.

    Husi rezultadu investigasaun ne’ebé halo, PDHJ sei la hola desizaun maibé hato’o de’it rekomendasaun ba Ministério relevante sira no ikus hato’o rekomendasaun ba Parlamento Nasional.

    Iha aprezentasaun materia ne’e, Provedor dehan ba partisipantes sira katak, iha lei mos hateten instituisaun  PDHJ iha kna’ar importante ida atu tau matan ba servisu funsionáriu públiku hotu no laos deit tau matan no investiga deit, maibé hare mos ba buat ne’ebé lao iha administrasaun públiku la tuir lei ne’ebé iha presiza kolabora hamutuk hodi hadia.

    Aleim de koalia kona-ba kna’ar Provedoria nian, Provedor mos esplika kona-ba importansia direitus humanus tanba ita nudar servidor estadu persiza mos hatene kona-ba saida mak violasaun direitus humanus no saida mak krime, no sei mak sai autor ba violasaun direitus humanus no krime ne’e.

    Ministro Planu no Finansas, Dr. Rui Agostu Gomes hateten, instituisaun PDHJ, KAK, IJE no KFP realiza atividade ne’e hanesan parte importante tebes hodi fahe informasaun kona-ba boa governasaun ba funsionárius públikus sira ne’ebé hala’o kna’ar iha Ministério Planu no Finansas atu nune’e, bele hala’o funsaun nudar servidor estadu ho responsabilidade, efikasia no efisiênsia.

    Atividade workshop ne’e fahe ba sesaun rua mak hanesan sesaun ba dahuluk orador husi Provedor Dr. Silvério Pinto Baptista, koalia kona-ba Papél PDHJ no Prinsipiu Direitus Umanus, Adjunta Provedor Dra. Jesuina Maria Ferreira Gomes, MPA koalia kona-ba Prinsipiu no Kategoria Violasaun Boa Governasaun no Inspetor Jeral Estadu Dr. Francisco de Carvalho koalia kona-ba Pepél IJE ba Kontrolu utelizasaun rekursu estadu. No iha sesaun dalaruak orador husi Prezidente Komisaun Funsaun Publika, Prof. DR. Faustino Cardoso Gomes, M. Si koalia kona-ba Promove integridade funsionariu publiku ba jestaun efisiensia no efikasia rekursu estadu no Komisario Komisaun Anti Korupsaun, Dr. Aderito António Tilman koalia kona-ba Tipu no forma korupsaun iha setor públiku.

    Abertura ba atividade ne’e mak Ministro Ministério Planu no Finansas, Dr. Rui Agostu Gomes, ne’ebé akompaña husi Vice Ministra Plano no Finansas, Dra. Sara Lobo Brites, Provedor Dr. Silvério Pinto Baptista, Adjunta Provedor ba área Boa Governasaun, Jesuina M. F. Gomes, MPA no Inspetor Jeral Estadu Dr. Francisco de Carvalho. No partisipantes iha workshop ne’e, mai husi Diretores Jerais, Diretores Nasionais no Xefi Departamentu sira iha Ministério Planu no Finansas.