RAEOA : 28 Marsu 2019, Provedor Adjunto ba área Boa Governasaun Dr. Miguel Pereira de Carvalho akompaña husi Diretor PDHJ Delegasaun Territorial Oe-cusse no Ofisial Diresaun Fiskalizasaun no Rekomendasaun hasoru malu ka enkontru ho Segundu Komandante Polisia Nasional Timor-Leste (PNTL) Distrito Oe-cusse no membrus Polisia Distrito Oe-cusse iha salaun enkontru Polisia Distrito Oe-cusse.
Objetivu husi enkontru ne’e, atu partilha infomasaun ba malu kona-ba servisu Provedoria nian liga ba servisu fiskalizasaun iha sela detensaun polisia tantu iha sela detensaun polisia iha Munisipiu 12 no RAEOA.
Provedor Adjunto esplika ba partisipantes sira katak, Parlalamento Nasional (PN) kria Lei Nú. 7/2004 kona-ba Estatuto Provedoria nian hodi fó kompetensia 4 mak hanesan kompotensia Investigasaun, Fiskalizasaun no Rekomendasaun, Mediasaun no Konsiliasaun, Promosaun no Anti Korupsaun, maibé kompetensia kona-ba Anti Korupsaun wainhira governu hari’i Komisaun Anti Korrupsaun (KAK) nian, oras ne’e dadaun la tama ona iha kompetensia PDHJ nian.
“Maibé PDHJ kontinua hala’o nia kompetensia sira seluk mak hanesan Investigasaun, Fiskalizasaun no Rekomendasaun, Mediasaun no Konsiliasaun no Promosaun. Kompetensia Investigasaun ba aktus violasaun direitus humanus no violasaun boa governasaun.
PDHJ hanesan Instituisaun Independente ho nia funsaun prinsipal mak atu simu keixa ka reklamasaun husi sidadaun sira hasoru entidades públikus sira ba kazu violasaun direitus humanus no violasaun boa governasaun. Entidades públikus sira mak hanesan Governo, inklui Polisia no F-FDTL.
“Kompetensia Fiskalizasaun no Rekomendasaun PDHJ ba aktus governo nian mak hanesan PDHJ halo fiskalizasaun ba servisu ne’ebé PNTL halo em relasiona ho detensaun ba detidu sira iha sela detensaun Polisia nian. Ho rezultadu fiskalizasaun, ekipa Monitoring PDHJ elabora ona relatoriu dadus hirak ne’e, no hato’o ba orgaun kompetente sira liu husi rekomendasaun iha relatoriu laran hodi toma medidas ne’ebé nessesariu.
Iha biban ne’e, Provedor Adjunto husu ba Komando Polisia Nasional Timor-Leste Distrito Oe-cusse atu servisu hamutuk hodi tau matan ba sidadaun sira nia direitu. Papel PNTL nian hodi garante ordem público wainhira akonte perturbasaun, maibé atuasaun PNTL nian tenke garante direitu no liberdade fundamental sidadaun sira nian wainhira PNTL detein sira iha sela de detensaun PNTL.
“Tanba ne’e, PDHJ hanesan Instituisaun Independente ne’ebé promove no proteze prinsipius direitus humanus. No husu ba membrus Polisia sira hotu atu mos respeitu sidadaun sira nia direitu”, sujere Provedor Adjunto.