Provedor Enkontru ho Sosiadade Sivil RAEOA

RAEOA – Iha loron 1 Agostu 2018, Provedor, Dr. Silvério Pinto Baptista akompanha husi Diretor DT-RAEOA Sr. Paulo Ribeiro no Diretor Fiskalizasaun no Rekomendasaun Sr. Bartolomeu Gonçalves hasoru malu ho Organizasaun Sosiadade Sivil sira iha RAEOA iha salaun enkontru edifisiu DT-RAEOA.

Provedor Dr. Silvério Pinto Baptista hateten, atividade enkontru ho maluk organizasaun sosiadade sivil iha RAEOA ne’ebé hamahan a’an iha Rede Informasaun ONG Oe-cusse (REINO) ho nia objetivu atu koalia kona-ba kordenasaun servisu entre instituisaun Provedoria ho ONG sira iha RAEOA, e mespu tempu fahe informasaun ba malu liga ba servisu ida-idak nian hodi atende komunidade sira nia problema iha terenu.

Provedor hatutan, sosiadade sivil hanesan parseiru ida ba PDHJ hodi atende komunidade sira nia problema ne’ebé liga ba direitus umanus no boa governasaun, tan ne’e PDHJ tenki kria koperasaun diak ho sosiadade sivil hodi patilha informasaun ba malu.

“Hau mai iha ne’e, sempre hasoru malu ho sosiadade sivil sira iha ne’e, tanba sira nia servisu mos kuaze hanesan ho PDHJ atende komunidade sira ne’ebé afeitadu ba problema liu-liu ba problema rai, violensia domestika, violasaun direitus umanus no sira seluk, entaun ita hasoru malu ne’e atu fahe fali problema sira ne’ebé sira hetan iha terenu”, dehan Provedor.

Iha enkontru ne’e, Provedor enkoraza nafatin ba parte sosiadade sivil sira atu kontinua fahe informasaun ba komunidade sira no mos bele ajuda autoridade karik komunidade sira infrenta konflitu entre komunidade ho autoridade sira.

“Ita hatene katak iha Oe-cusse agora autoridade halo hela prosesu dezenvolvimento fizíka, ne’ebé dala ruma halo levantamento konaba rai ou dala ruma halo kompesasaun ba ai moris sira ne’e, tanba uluk la iha politika maibé agora dadaun iha ona politika ne’ebé hato’o ona ba autoridade sira atu bele konsidera komunidade nia rai ou ai horis ne’ebé hetan afeitadu husi projetu ne’e”, esplika Provedor.

Provedor husu nafatin ba maluk sosiadade sivil sira iha Oe-cusse atu ajuda nafatin maluk komunidade sira atu hare didiak sira nia dadus atu labele mosu problema wainhira autoridade halo kompensasaun.

Liga ba asuntu violasaun iha Oe-cusse, Provedor esplika katak, iha enkontru ho parte sosiadade sivil sira informa mos konaba kazu violensia domestika a’as iha Oe-cusse, tanba ne’e husu ba parte hotu-hotu atu kopera nafatin atu prevene kazu sira hanesan nune’e iha future.

Provedor sujera REINO nudar mahon ba ONG lokal iha Oe-cusse, atu iha enkontru regular entre membrus REINO hamutuk ho reprezentante autoridade sira inklui mos PDHJ no parte PNTL, atu nune’e ita bele partilha informasaun ba malu.

Partisipantes iha enkontru ne’e mai husi ONG sira mak hanesan ONG Alfela, Pradet, Y-ACHT, CECEO, FPWO, A-FFOS, FFSO, SDEO, PNTL no DNPP.