• Provedor foun iha komitementu hodi haforsa independensia PDHJ

    Dr. Silverio Pinto Baptista ne’ebé maka eleitu ona ba Provedor de Direitos Humanos e Justiça liu husi eleisaun direitu no sekretu iha Parlamentu nasional ho votos afavor 37 no vota kontra 23 no abstensaun zero. Dr. Silverio Pinto Baptsita simu toma de pose husi Dr. Vicente Guterres, Presidente Parlamentu Nasional iha salaun konferensia Parlamentu Nasional iha loron 30 Outubro 2014.

    Dr. Silverio Pinto Baptista, Provedor iha nia diskursu promete katak Instituisaun ka Órgão independente PDHJ sei kontinua hala’o nia funsaun ho independencia em relasaun ho Governo, partidos politicos no entidades publicos sira seluk. Provedor promote sei halao knaar ho independencia, imparsialidade, integridade no responsabilidade tomak ba interesse nas ional.

    Provedor rekoñese katak, durante periodu Dr. Sebastião Dias Ximenes, Provedor sesante nia mandatu, atividades regular barak maka hala’o ona hanesan simu keixas husi komunidade sira no mos ho inisiativa rasik, hala’o investigasaun ba keixas kona-ba indikasaun mal administrasaun no indikasaun violasaun direitos humanos husi autoridades públikus, hala’o monitorizasaun ba projetu sira maka governu hala’o no mos hala’o monitorizasaun regular iha sela detensaun no prizaun sira, halo promosaun no edukasaun, halo mediasaun no konsiliasaun.

    Provedor hatutan durante ne’e iha ona rezultadu no mos impaktu signifikante husi atividade sira ne’ebé PDHJ hala’o, ezemplu hahu husi tinan 2005-2014 total keixas ne’ebé PDHJ simu kona-ba indikasaun mal adminisrasaun hamutuk 1.179 no keixas kona-ba indikasaun violasaun direitos humanos 759. Husi keixas ne’e maioria PDHJ finaliza investigasaun no konklui ona relatoriu no hato’o ona rekomendasaun ba ministeriu no instituisaun relevante hodi implementa no mos kazu krime PDHJ hato’o ba ministeriu públiku hodi kontinua halo prosesu.

    Provedor hatutan katak hodi garante métodu efisiente hodi sukat PDHJ nia impaktu servisu, sei esforsu maka’as hodi implementa atividades PDHJ bazeia ba mandatu legal hanesan instituisaun estadu nian. Maibé difikulades ne’eb’e PDHJ hasoru oras ne’e dau-daun maka, orsamentu estadu ne’ebé aloka ba PDHJ la sufisente hodi implementa programa refere. Hanesan iha tinan 2014 orsamentu jeral estadu ne’ebé aloka ba PDHJ ho total $ 1,512.000.00 nune’e mos bazeia ba planu orasmentu ba tinan 2015 ne’ebé aprova ona husi komite revizasaun orsamentu ba PDHJ hamutuk $ 1,095.000,00.

    Provedor dehan ho orsamentu ne’ebé ki’ik no atividades PDHJ ne’ebé barak no nesesita tebes atu implementa iha tinan 2015. Nune’e Provedor husu ba Membros Parlamento Nacional sira hotu nia nia apoiu politika tomak liu-liu atu bele aprova orsamentu ne’ebé adekuadu hodi nune’e bele fasilita atividades PDHJ iha rai laran no mos estrangeiru tuir planu ne’ebé determina ona hodi bele promove no proteje Direitos humanos no promove boa-governasaun iha Rai doben Timor-Leste.

    Provedor promete katak sei kontinua hametin nafatin koperasaun servisu iha nivel nasional no internasiona ho instituisaun estadu no sosiedade sivil, UN Agensia no doadore sira ne’ebé iha aria servisu hanesan ho PDHJ ba interese nasional.