• Provedor Kestiona Ho Rehabilitasaun Edificio MSS

    Date:   10-10-2012

    Dili – Provedor de Direitos Humanos e Justiça (PDHJ) Dr. Sebastião Dias Ximenes kestiona no lamenta ho projetu rehabilitasaun eis edificio no muro (pagar) Ministério da Solidariedade Social (MSS) tanba tuir observasaun PDHJ  katak edificio, liu-liu muro MSS nian sei kondisaun diak no foin hadia iha tinan 2010.

    Tanba tuir Provedor katak, ne’e gasta osan estado nian ne’ebe la iha benefisiu, portantu lolos ne’e, kuandu ita hakarak halo rehabilitasaun ba buat ne’ebe a’at ona mak foin halo rehabilitasun, laos sobu buat ne’ebe sei diak no foun tau fali buat foun seluk, ne’e hatudu katak ita gasta osan povu nian arbiru deit.

    Tanba, ita hotu hatene katak, iha eskola barak iha Distrito inklui mos eskola sira iha kapital Dili rasik mos ho kondisuan ne’ebe a’at tebes maibe seidauk hadia, nusa osan ne’ebe atu reabilita muro MSS nian ne’e la uza ba buat seluk hodi ajuda ema kiak sira.

    Hanesan projetu rehabilitasaun edificio no muro  ne’e sai preukupasaun no laran triste ba Provedor, tanba kondisaun muro ne’e  ita hare sei diak no furak liu PDHJ nian, tanba sá tenke sobu ???.

    Provedor husu ba Ministra Solidariedade Social atu hare buat sira hanesan ne’e, tanba ita mos tenke iha sentidu solidariedade ba buat seluk ne’ebe que seidauk hadia prezisa hadia mos ho osan estado nian.

    Provedor la fo kulpa ba kompanhia ne’ebe kaer projetu ne’e, maibe kestiona deit mak orsamentu estadu ne’ebe utiliza ba projetu ne’e. Iha Instituisaun barak que seidauk iha edificio rasik, tansa Governo tenki gasta osan barak ba edificio MSS nian ne’ebe foin hetan edificio foun.

    Provedor iha nia kompetencia atu superviziona funcionamento kna’ar Governo nian no nia orgaun sira, tanba ne’e, Provedor rasik telefone ona ba Ministra Solidariedade no Ajencia Dezenvolvimento Nacional (ADN) atu hare questaun ne’e, para que osan projetu labele gasta arbiru deit.

     Presiza Informasaun Kontaktu Lady Ximenes, TP Relasaun Públika PDHJ, Telemovel 7730 4260 ou Jóse Tefa 7735 1412 ou 3331071.