provedor tuir enkontru anual apf iha malaysia
Date, 04-08-2008
Provedor dos Direitos Humanos e Justiça (PDHJ) Dr. Sebastião Dias Ximenes no funsionáriu nain rua husi PDHJ tuir enkontru anuál Asia Pacific of National Human Rights Institution (APF) ba dala 13 iha Kuala Lumpur Malaysia.
Enkontru anuál Asia Pacific Forum husi Instituisaun Nasionál ba Direitos Humanos ne’ebé hahú husi loron 28 to’o 31 Jullu 2008 partisipa husi instituisaun ba direitos humanos ne’ebé sai membru APF. Sai uma nain ba enkontru ne’e mak Komisaun Direitos Humanos Malaysia.
“Topiku iha enkontru ne’e kona-ba direitos humanos en jerál. Topiku espesífiku mak kona-ba trafiku umanu, edukasaun direitos humanos, traballadór imigrante liu-liu ema ne’ebé la iha kbiit atu defende sira-nia direitu” hateten Gina Leila Alves, Diretora Asisténsia Públika.
Delegasaun husi PDHJ ne’ebé partisipa iha enkontru anuál ne’e mak hanesan Dr. Sebastião Dias Ximenes Provedor, Valerio Magno Ximenes, diretór Direitos Humanos no Gina Leila Alves, Diretora Asisténsia Públika.
“Iha enkontru ne’e mós membru APF sira husi nasaun ida-idak aprezenta sira nia relatóriu kona-ba atividade ne’ebé sira hala’o ona durante tinan ida nia laran” hatutan Gina.
Iha tinan kotuk PDHJ sai ona full member ba APF liu husi enkontru anuál ba dala 12 Asia Pacific Forum Instituisaun Nasionál ba Direitos Humanos ne’ebé momentu ne’ebá hala’o iha Sydney Australia.
“Enkontru ne’e importante tanba membru sira bele fahe esperensia kona-ba atividade no dezafiu sira ne’ebé instituisaun Direitos Humanos sira hasoru. Nune’e mós instituisaun foun Direitos Humanos ne’ebé foin harii hanesan PDHJ bele troka esperensia ho instituisaun seluk ne’ebé harii kleur ona no iha esperensia barak” hateten Gina.
Presiza informasaun kontaktu
Lady Ximenes, Informasaun & Relasaun Públika PDHJ
HP, 7304260 ou 333 10701