• Provedora Adjunta Divulga Knar PDHJ Iha Diplomacy Training Program

    Dili : Provedora Adjunta ba Direitus Humanus Sra. Benícia Eriana Magno, divulga knar Provedoria Direitus Humanus no Justisa (PDHJ) ba partisipante sira iha programa treinamentu diplomasia ka Diplomacy Training Program ne’ebé hala’o iha salaun komfrensia João Paolo, Komoro Dili, 23/08/2019.

    Adjunta hateten, PDHJ implementa ninia programa bazeia ba mandatu Konstitusionál ne’ebé defini iha artigu 27 Konstituisaun RDTL katak, PDHJ nu’udar órgaun independente ida-ne’ebé iha knaar atu haree no buka hatán sidadaun sira-nia problema hasoru podér públiku, hodi haree loloos hahalok sira-ne’e tuir duni lei, no halo prevensaun no hahú prosesu tomak hodi haburas fali justisa. Alende ne’e knar PDHJ nian defini iha Estatutu Lei nú. 7/2004 no Decretu Lei nú 31/2016.

    Ho knar konstitusionál ne’e, maka defini mós vizaun PDHJ nian atu proteze direitus humanus, hametin integridade no promove governasaun di’ak iha Timor-Leste, no misaun PDHJ nian maka atu halo edukasaun, promove kooperasaun, rezolusaun, halo investigasaun, peskiza no monitorizasaun.

    Adjunta informa liutan katak, tuir planu estratéjiku PDHJ nian, defini prioridades haat sai nu’udar mata dalan ba atividades PDHJ nian hotu mak hanesan; primeiru, autoridade públika iha koñesementu di’ak konaba direitus humanus no governasaun di’ak, segundu, autoridade sira halo prevensaun no koresaun ba prinsipius direitus humanus nomós governasaun di’ak, terseiru, ema vulneravel sira hetan protesaun hasoru abuzu direitus humanus no mós bele hetan asesu di’ak ba atendementu públiku, haat, asegura kapasidade no independensia PDHJ nian hodi garante katak PDHJ bele implementa nia mandatu ho di’ak.

    Iha tempu hanesan, partisipante sira husu konaba violasaun direitus umanus ne’ebé komete husi autoridade seguransa, no Adjunta responde katak, preokupasaun hanesan hato’o mós husi sosiedade sivil, maibé Adjunta halo komparasaun katak, pursentazen involvimentu membrus polisia formadus iha violasaun direitus humanus hahu menus. Ne’e hatudu katak, gráfikamente membrus polisia barak intende ona  konaba direitus humanus.

    Iha fatin hanesan, Koordenador Programa Treinamentu Diplomasia, Amish Karki hateten, Diplomacy Training Program harii husi Premiadu Novel da Paz, DR José Ramos Horta   hamutuk ho Emeritus Professor Garth Nettheim husi New South Wales iha tinan 1989 iha Darwin, Australia.

    Programa ida ne’e kobre area oioin, inkluindu programa sobre oinsa atu promove no fó defensoria ba direitus umanus iha mundu liu-liu iha rejiaun Ásia Pasífiku. Tanba ne’e, realiza Diplomacy Training Program iha Dili durante semana rua ho partisipantes hamutuk nain 27 husi nasaun 11 iha Ásia Pasífiku, dehan Karki.

Comments are closed.