Dili : Provedora Direitus Umanus no Justisa, Sra. Jesuina Maria Ferreira Gomes, MPA ho Provedor Adjuntu ba Governasaun Di’ak, Sr. Miguel Pereira de Carvalho, partisipa iha Ekontru Jerál Annuál ba dala 24 no Komfrensia Biennial (tinan rua dala ida) ne’ebé organiza husi Forum Ásia Pasífiku ka Asia Pacific Forum (APF) iha Seoul, Repúblika Korea hahú loron 3 to’o 5 Setembru 2019.
APF Nu’udar forum ne’ebé parseria ho Komisaun Nasionál Direitus Umanus Korea ka National Human Rights Commission of Korea (NHRCK), ne’ebé sai mós nu’udar uma nain ba Komfrensia Biennial ho tema Kombate Ódiu no Diskriminasaun: Dignidade ba Ema Hotu. “Combating Hate and Discrimination: Dignity for All”.
Iha Enkontru Jerál Annuál ne’ebé hala’o iha loron 3 to’o 4 Setembru 2019 iha Korea, nu’udar opurtunidade ida hodi diskuti isu sira ne’ebé pretinente no relativamente ho isu bisnis, ne’ebé somente partisipa deit husi Forum Councellors, Membrus APF no Reprezentante husi ANNI.
Entretantu iha Komfrensia Biennial ne’ebé hala’o iha loron 05/09/2019 iha Korea, Provedora Jesuina Maria Ferreira Gomes, MPA, hetan opurtunidade hodi halo aprezentasaun konaba tópiku Kombate Ódiu no Diskriminasaun, espesifikamente foka ba iha komunidade Lesbia, Gay, Biseksuál, Transjéneru, Interseks (LGBTI) nomós direitus Ema ho Defisiensia iha Timor-Leste.
Kestaun konaba direitus komunidade LGBTI no direitus ba Ema ho Defisiensia, sei sai assuntu importante ida ne’ebé sei koloka iha enkontru annuál Forum Instituisaun Nasionál Direitus Umanus Sudeste Asiátiku ka South East Asia National Human Right Institutions Forum (SEANF) nian, ne’ebé sei hala’o iha Dili loron 22 to’o 24 Outubru 2019.
APF hanesan rede rejionál ba Instituisaun Nasionál Direitus Umanus ka National Human Rights Institutions (NHRIs) ne’ebé kompostu husi pais membrus hanesan Afganistaun, Australia, Bahrain, Bangladesh, India, Indonesia, Iraq, Jordan, Kazakhstan, Kyrgyztan, Malaysia, Maldives, Mongolia, Myanmar, Nepal, New Zealand, Oman, Palestine, Philipines, Qatar, Samoa, Republic of Korea, Sri Lanka, Thailand no Timor-Leste.
Entretantu iha enkontru annuál ne’e, partisipa mós husi instituisaun governu, ONG no organizasaun sira ne’ebé haknar iha programa kombate deskriminasaun no ódiu, inkluindu péritu direitus umanus sira, hodi hamutuk hasa’e konsensia ba kombate deskriminasaun no ódiu, hasa’e boa prátika no abilidade hodi responde ba isu sira relativamente, halo diskusaun no explora oportunidade hodi abranza kooperasaun rejionál, hodi responde ba ameasas sira liga ho violasaun ba direitus ema nian iha Rejiaun Ázia Pasífiku.