• sede regional pdhj loke iha maliana, komunidade maliana sente urgulu

    Data, 01-06-2009

    Provedoria dos Direitos Humanos e Justiça (PDHJ) iha sexta loron 29 Maiu 2009 loke Sede Regional PDHJ nian iha Maliana-Bobonaro. Programa referee loke ofisialmente husi Vixe Prezidente Parlamentu Nasionál Maria Paixao. Sede Regional iha Maliana kobre husi distritu Bobonaro, Covalima no Ermera.

    “Objetivo hodi loke PDHJ iha Maliana-Bobonaro ne’e atu hametein liu tan konfiansa komunidade nian ba Instituisaun PDHJ. Alien ida ne’e atu bele hakbesik-an liu tan ba povo hateten Dr. Sebastião Dias Ximenes, Provedor.

    Iha diskursu Provedor hateten PDHJ presiza hakbesik-an liu tan ba komunidade iha area rural inklui iha Maliana, atu nune’e bainhira sidadaun ruma nia direitu violadu bele hato’o keixa ba PDHJ hasoru poderes públiku. Nune’e mós PDHJ garante katak sei la fó sai kualker sidadaun ne’ebé hato’o keixa ba PDHJ. Nune’e komunidade iha area referee bele kolabora ho PDHJ hodi hato’o informasaun ruma relasaun ho mal administrasaun, violasaun direitos umanus no korrupsaun ne’ebé hala’o husi funsionariu públiku sira”.

     “Alien ida ne’e PDHJ mós presiza kolaborasaun husi PNTL, Administrador distritu, bainhira PDHJ hala’o nia knaar iha Maliana atu nune’e bele serbi di’ak liu tan estadu de direitu maibé presiza respeita instituisaun ida-idak nia servisu” hatutan Provedor.  

     Entertanto Semedo Lacu Costa, reprezentante Administrador Distritu Bobonaro iha nia diskursu hateten katak, povo distritu Bobonaro sente urgulu no kontente teb-tebes tanba ho PDHJ nia prezensa bele kontrola servisu autoridade nian hodi hala’o servisu ho transparensia liu-liu bainhira ezekuta orsamentu estadu nian ne’ebé koloka ba distritu referee”.

     “ Komunidade Bobonaro prontu atu kolabora ho PDH, nune’e mós komunidade iha area referee fiar katak ho PDHJ nia prezensa bele satisfas povo nia hanoin no hakarak ne’ebé durante ne’e sira hein hela mak hari’i governasaun ida ne’eb’e di’ak no laiha korrupasaun no violasaun direitos umanos” hatutan Semedo.  


    Iha fatin hanesan Maria Paixao, Vixe Prezidente Parlamento Nasional hateten katak, Parlamentu Nasional kongratula PDHJ tanba maske orsamentu estadu nian la prevee PDHJ bele hola inisiativa hodi hari’I Sede Regional Maliana.

     Vixe Prezidente PN ne’e husu ba komunidade iha distritu Bobonaro atu lalika tauk atu kesar deputadu sira, membru governu no funsionariu públiku ruma ne’ebé halo hahalok ruma la tuir lei ne’ebé vigora.

     Ikus liu Paixao rekuiñese katak “PDHJ nu’udar instituisaun Istadu nian ne’eb’e indepedente bele kompleta instituisaun sira seluk hanesan prokuradoria atu hari’I justisa iha nasaun soberanu ida ne’e. Bainhiura iha justisa desenvolvimentu sei la’o no demokrasia mós sei buras”.

     

    Presiza informasaun kontaktu

    Lady Ximenes, Informasaun & Relasaun Públika PDHJ

    HP, 7304260 ou 333 10701