• Seminariu Konjuntu CI-CNE Kona-ba Kobertura Iha Eleisaun 2017

    Dili- iha loron 8 Marsu 2017, Provedor Interino atual Adjuntu Provedor ba área Diretus Umanus Dr. Horacio de Almeida hetan oportunidade sai núdar panel importante ba seminariu ho tema “Seminariu Konjuntu CI-CNE Kona-ba Kobertura Iha Eleisaun”. Seminariu ne’e realiza atu fahe koñesementu ba jornalista sira husi Instituisaun Media Imprensa no Elektronika kona-ba oinsa sira nia direitu no dever atu asesu ba kobertura iha terenu durante inisiu kampaña eleisaun jeral 2017, tanba iha Konstituisaun Repúblika Demokratika Timor-Leste (RDTL) rasik garante ema hotu iha direitu atu asesu ba informasaun.
    Provedor Interino iha nia palestra hateten katak, ema hotu-hotu iha direitu ne’ebé livre atu eskolha nia partidu, eskolha kandidatu, direitu ba vota, direitu ba movimentu ba mai no mos iha direitu atu asesu ba informasaun ne’ebé garantidu.
    “tanba ita koalia estadu de direitu demokratiku ninia hun mak Konstituisaun RDTL, depois mós konvensaun internasional sira ne’ebé estadu Timor-Leste ratifika tiha ona atu garante sidadaun hotu nia direitu,” hateten Provedor Interino.
    Provedor Interino hatutan tan katak, jornalista iha direitu atu asesu ba informaasaun, maibe papel importante mak jornalista sira tenki fahe informasaun ida ne’ebé justu, independente, imparsial, ekilibriu no responsabilidade no labele koalia direitu deit maibe iha deveres mós, entaun buat rua ne’e tenki balansu iha prosesu demokratizasaun iha prosesu eleisaun ne’e.
    Atual Adjuntu ne’e mos afirma tan katak aleinde media, PDHJ mos iha papel importante atu asegura politika festa demokrasia, tanba iha Konstituisaun RDTL artigu 27 iha ne’eba koalia kona-ba saida maka papel Provedoria nian, tanba vizaun ho misaun Provedoria nian mak oinsa atu proteje no promove direitus umanos no mós promove governasaun diak iha Timor-Leste.
    Relasiona ho papel ne’ebé iha agora dadaun PDHJ mós iha hela ekipa ida ne’ebé halo hela monitorizasaun ba iha prosesu kampaña kandidatus partidu politikus sira ne’ebé agora lao hela.
    Seminariu ne’e realiza iha salaun Konferensia CNE-Caicoli-Dili no hetan partisipasaun husi Jornalista sira inklui orador husi Konselho de Imprensa, CNE no PDHJ rasik.

Comments are closed.