Servisu Ho Responsabilidade

Dili – Iha loron 28 fulan Dezembru 2016, Provedor, Dr. Silverio Pinto Baptista hamutuk ho funsionarius sira ne’ebé hala’o servisu iha nasional no mos iha rejional 4 mak hanesan Rejional Baucau, Maliana, Same no Rejional Oe-cusse realiza enkontru jeral hodi avalia servisu durante hala’o iha tinan 2016 nian.
Objetivu husi enkontru ne’e, atu avalia fila fali servisu ne’ebé realiza tiha ona iha tinan 2016 nian no mos atu rona preukupasaun husi funsionariu ida-idak nian kona-ba ninia servisu durante hala’o no mesmu tempu buka solusaun hodi rezolve ba preukupasaun hirak ne’ebé funsionariu sira hato’o ba responsavel máximu iha instituisaun Provedoria nian.
Provedor Dr. Silverio Pinto Baptista iha abertura hateten katak, enkontru jeral ne’ebé hala’o hanesan enkontru ba dala ikus nian iha tinan 2016, tanba ne’e husu nafatin ba imi (funsionarius red) ida-idak atu hala’o servisu ho responsabilidade, atu nune’e ita bele hatudu imagen ne’ebé diak no furak ba instituisaun seluk no mos hatudu ba ita nia komunidade tanba ita nia instituisaun hala’o nia knaár mos atu kontrola instituisaun seluk nia servisu no mos atu simu ita nia komunidades sira nia problema hasoru entidades públiku sira karik iha entidades balun viola sira nia diretu.