• Website

    Treinamentu Direitus Umanus ba membru BOP Baucau

    Baucau : Iha loron 3 to’o loron 7 Abril 2017, Provedoria dos Direitos Humanos e Justiça (PDHJ), Sentru Formasaun Polisia-PNTL no ONU Direitus Umanus iha Timor-Leste, realiza treinamentu kona-ba kna’ar polisia no protesaun direitus umanus ba membrus PNTL husi Batallaun Ordem Públiku (BOP) Kompanhia Bravo Munisipiu Baucau.

    Objetivu husi treinamentu ne’e, atu hasa’e koñesimentu kona-ba direitus umanus liga ba sira nia kna’ar. Materia treinamentu kona-ba kna’ar PDHJ, kna’ar polisia no direitus umanus, konseitu no prinsipiu husi uza forsa, polisiamentu no direitus umanus ba ema vulneravel nian.

    Diretor Interino PDHJ Delegasaun Territorial Baucau, Sr. Agapito Rodrigues iha seremonia enserimentu ba atividade treinamentu ne’e hateten katak, atividade ne’e importante tebes ba instituisaun PDHJ no PNTL hodi prepara a’an didiak ba futuru, tanba liga ba situasaun em jeral agora ita sei hasoru eventu bo’ot ida mak hanesan festa demokrasia ba eleisaun lejislativa ne’ebé sei akontose iha tinan ida ne’e nia laran.

    No mos husu ba partisipante sira katak, ho materia hirak ne’ebé fasilitadores sira fó durante loron hirak nia laran hanesan bukae ida ba imi (partsipantes Red) sira, maibe la signifika katak lor-loron imi tenki le’e hela deit materia hirak ne’e, maibe husu karik iha tempu bele loke fali materia hirak ne’ebé hetan iha treinamentu ne’e, atu nune’e bele aumenta tan imi nia koñsimentu liga ba kna’ar polisia nian.

    Iha fatin hanesan, Reprezentante Assesoria Direitus Umanus ONU iha Timor-Leste, Sra. Amelia de Araujo hateten katak, atividade treinamentu konjunta entre PDHJ, CFP no UADU- ONU Timor-Leste ba membru polisia sira la’os tur-tur deit mak hala’o atividade ne’e, maibé bazeia ba rekomendasaun husi nasaun barak ba estadu Timor-Leste, tanba ita ratifika konvensaun internasional. Ho nune’e husu ba Governu atu kontinua kapasita nafatin membru PNTL sira hodi hatene kona-ba diretus umanus liu-liu liga ba kna’ar polisia nian.

     

    Aleinde ne’e mos, Reprezentante Komandante Centro Formasaun Polisia, Sr. Jose Lopes husu ba partisipantes sira atu kontinua aprende liu-liu ba materia hirak ne’ebé hetan husi fasilitadores sira husi PDHJ, UADU no CFP rasik liga ba ita núdar polisia. Liu husi materiak hirak ne’e, bele fó benefisiu diak mai ita wainhira hala’o servisu iha terreno ou mesmu tempu mos iha benefisiu mai ita wainhira atu tuir tes promosaun ruma.

Comments are closed.