𝐃𝐞́𝐤𝐚𝐝𝐚 𝐑𝐮𝐚 𝐢𝐡𝐚 𝐄𝐳𝐢𝐬𝐭𝐞́𝐧𝐬𝐢𝐚, 𝐏𝐫𝐨𝐯𝐞𝐝𝐨́𝐫 𝐡𝐮𝐬𝐮 𝐄𝐧𝐭𝐢𝐝𝐚𝐝𝐞 𝐇𝐨𝐭𝐮 𝐀𝐭𝐮 𝐊𝐨𝐧𝐭𝐫𝐢𝐛𝐮𝐢 𝐛𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐏𝐃𝐇𝐉

Dili, 30 maiu 2024 – Provedoria Direitus Umanus no Justisa (PDHJ), iha loron 24 realiza semináriu nasionál hodi aborda tópiku 𝐏𝐃𝐇𝐉 𝐛𝐚 𝐅𝐮𝐭𝐮𝐫𝐮, halibur oradór no partisipante husi entidade oioin hanesan membru parlamentu nasionál, membru governu, sosiedade sívil no parseiru nasionál no internasionál. Semináriu ne’e parte ida husi série komemorasaun aniversáriu ezisténsia PDHJ nian ba da-20.

Iha diskursu makloke Provedór Virgílio da Silva Guterres ‘Lamukan’ alende rekorda susesu sira ne’ebé atinji ona, salienta mós kona-ba dezafiu sira ne’ebé hasoru no apela ba entidade hotu-hotu atu hola parte iha dezenvolvimentu PDHJ ni’an iha futuru. “Rezultadu peskiza prelimináriu no estudu sira antes hatudu menus husi pursentu 40 husi populasaun Timor-Leste de’it maka rona no hatene kona-ba ezisténsia PDHJ ni’an.” Hatete Provedór Lamukan.

Provedór haktuir liu tán, katak depois dékada rua ezisti, la’os de’it sidadaun sira, até polítiku no membru parlamentu balun seida’uk atribui ho lolós naran provedór ni’an. “Balun bolu diretór provedór, balun dehan prezidente provedoria, ne’e inklui membru parlamentu balun ne’ebé produz lei kona-ba Provedoria Direitus Umanus no Justisa. Iha serimónia protokolár sira, dalaruma protokolu sira la preukupa ho Provedór nia fatin tur. Iha diskursu sira, mós Provedór tama iha lista konvidadu de onra, mezmu tuir lei Provedór ne’e ekiparadu ho Porkuradór Jerál Repúblika.

Provedór Lamukan enfatiza: “𝐭𝐞𝐦𝐢 𝐢𝐝𝐚 𝐧𝐞𝐞 𝐥𝐚’𝐨𝐬 𝐚𝐭𝐮 𝐛𝐮𝐤𝐚-𝐨𝐢𝐧 𝐦𝐚𝐢𝐛𝐞́ 𝐩𝐫𝐞𝐮𝐤𝐮𝐩𝐚𝐬𝐚𝐮𝐧 𝐢𝐝𝐚, 𝐚𝐭𝐮 𝐤𝐨𝐧𝐭𝐫𝐢𝐛𝐮𝐢 𝐛𝐚 𝐢𝐧𝐟𝐨𝐫𝐦𝐚𝐬𝐚𝐮𝐧 𝐤𝐨𝐧𝐚-𝐛𝐚 𝐤𝐮𝐥𝐭𝐮𝐫𝐚 𝐞𝐬𝐭𝐚𝐝𝐮-𝐧𝐢𝐚𝐧 𝐚𝐭𝐮 𝐡𝐚𝐭𝐮́𝐫 𝐨́𝐫𝐠𝐚𝐮𝐧 𝐞𝐬𝐭𝐚𝐝𝐮 𝐢𝐝𝐚-𝐢𝐝𝐚𝐤 𝐢𝐡𝐚 𝐧𝐢𝐚-𝐟𝐚𝐭𝐢𝐧.” Nia hatutan tuir lei, iha órgaun soberanu no iha mós órgaun konstitusionál, órgaun estadu ne’ebé moris tanba lei. No Provedór Direitus Umanus no Justisa ne’e ógaun konstitusionál independente ne’ebé moris bazeia ba konstituisaun. Provedór reforsa, “konsiderasaun sira hanesan ne’e afeita ba ita nia-hanoin no presepsaun atu fundamenta ita nia pozisaun ba dezenvolvimentu instituisaun ida ne’e, liu-liu 𝐚𝐥𝐨𝐤𝐚𝐬𝐚𝐮𝐧 𝐫𝐞𝐤𝐮𝐫𝐬𝐮 𝐧𝐨 𝐨𝐫𝐬𝐚𝐦𝐞𝐧𝐭𝐮 𝐣𝐞𝐫𝐚́𝐥 𝐞𝐬𝐭𝐚𝐝𝐮 ba PDHJ.”

Ho dezafiu sira ne’e maka Provedór Direitus Umanus no Justisa elabora no lansa ona nia Planu Estratéjiku 2024-2028, inisia ona peskija presepsaun públiku kona-ba PDHJ, inisia mós peskiza persepsaun públiku kona-ba prátika boa governasaun iha instituisaun públiku sira. Provedór mós habelar no hametin koperasaun ho entidade nasionál, rejionál no internasionál hodi hametin ezisténsia iha servisu protesaun no promosaun ba direitus umanus no boa governasaun.

Ba asuntu mídia kontaktu:
Joana da Cruz +670 78566745
Antoninho Bernardino +670 77709837
E: media@pdhj.tl

This post is also available in: English