PDHJ Publika Relatoriu Final Investigasaun
Dili : Loron, 30 Março 2022, Provedoria dos Direitos Humanos e Justiça halo lansamentu publikasaun ba iha Relatoriu Investigasaun Final Rekomendasaun, Sujestaun no Relatoriu Badak Arkivu nomós intrega relatoriu badak bai ha entidades relevantes sira.
“Iha trimestral I 2022, PDHJ halo investigasaunno produs relatoriu investigasaun hamutuk 67 kompostu husi relatoriu investigasaun final ho rekomendasaun 7 ba violasaun direitus umanus no governasaun diak, relatoriu investigasaun ho sujestaun 5 no relatoriu badak arquivu 56 (DH 36, BG 20),” Katak, Provedor Adjuntu, Sr. José Telo Soares Cristovão liu husi nia abertura iha Sala Biblioteca PDHJ Caicoli.
Nia hatutan, Relatoriu Investigasaun Final ho Rekomendasaun hirak ne’e relasiona ho violasaun direitus umanus liga ba asaun husi membru PNTL no professor ne’ebé viola komunidade nia direitu ba Liberdade, integridade no seguransa espesificamente tratamentu aát, kruel no la umanu, Direitu ba Moris, no Direitu Liberdade labarik husi violensia ka abuzu, iha mós asaun husi funsionariu balun ne’ebé pratika asaun administrasaun la diak, no ses husi poder.
Relasiona ho relatoriu hirak ne’e maka Kuarta ohin PDHJ halo lansamentu hodi entrega relatoriu hirak ne’e ba iha Ministeriu relevante 4 mak hanesan, Ministeriu Justiça, Ministeriu Administrasaun ESTATAL, Ministeriu Edukasaun, no PNTL. Maibe husi ministeriu 4 ne’e, Ministeriu ESTATAL no Komando Jeral PNTL mak konsege marka prejensa iha serimonia lansamentu hodi simu relatoriu refere no Ministeriu Justiça ho Edukasaun maka la marka prejensa maibe relatoriu ne’e PDHJ sei lori to iha sira nia fatin.
No bainhira instituisaun relevante sira simu ona relatoriu investigasaun final ho rekomendasaun tenke hato’o informasaun ba PDHJ kona-ba sasukat sira ne’ebé foti atu kumpri ka hala’o rekomendasaun sira ne’e iha loron 60 (neen nulu) nia laran, tuir artigu 47.3 husi Estatutu PDHJ, konta husi data simu relatoriu ne’e. karik instituisaun relevante la kumpri ka la hala’o lia menon hirak ne’e, Provedor Direitus Umanus no Justisa bele komunika akontesementu ida ne’e ba Parlamentu Nasional, tuie artigu 34 no 46 husi Estatutu PDHJ nian.
Iha fatin hanesan reprejentante, Komando PNTL, Segundo Comandante Comisario, Sr. Mateus Fernandes, haktuir sira nia parte nafatin agradese tebes-tebes bai ha instituisaun PDHJ ne’ebé mak sai ona hanesan intituisaun de kontrolu ida ne’ebé mak sempre fanu no halo evolusaun ba iha servisu PNTL sira nian nune’e labele viola no halai ses husi lei ne’ebé mak hatur ona.
Nia hatutan, “Tanba ne’e, ami simu Relatoriu ida ohin ho fuan no laran nune’e bele tulun hadiak liu tan ami nia servisu atu bele sai profisional liu tan,”
Entretantu serimonia lansamentu ne’e rasik realiza iha sala Biblioteca PDHJ Caicoli no loke husi Provedor Adjunto, Sr. José Telo Soares Cristovão, no partisipa husi Secretario Executivo PDHJ, Sr. Ambrosio Graciano, Xefe Gabinete, Sr. Silvino Soares Pereira, Diretores no Funsionariu PDHJ inklui Reprejentante husi Ministeriu ESTATAL, reprejentante husi Comando PNTL nomos Media nasional sira.