• adjunto silverio: estadu presiza promove no fó protesaun ba ema defisiente sira

    Data, 09-04-2008

    Provedoria dos Direitos Humanos e Justiça (PDHJ) liu husi divizaun Direitos Humanos iha Sesta Feira 11 Abríl sei organiza meza kabuar (redonda) iha edifísiu PDHJ Kaikoli Dili. Meza kabuar ne’ebé ho tema “Konvensaun kona-ba Direitu Ema Sira ne’ebé Defisiente” ho objetivo atu fahe informasaun kle’an liu tan kona-ba Konvensaun Direitu Ema Sira ne’ebé Defisiente.

    Timor oan ne’ebé sai hanesan defisiente, hetan oportunidade, direitu no obrigasaun hanesan mós ho ema seluk ka ema ne’ebé la’ós defisiente, maibé ema ne’ebé defisiente sei la hala’o knaar hirak ne’ebé sira labele hala’o tanba sira-nia defisiensia, hateten Dr. Silverio Pinto Baptista, Adjunto Provedor”.         

     

    Tuir Konstituisaun RDTL Artigu 21 hateten katak, “Sidadaun ne’ebé iha defisiensia fíziku no mental iha direitu no obrigasaun hanesan sidadaun sira seluk. Maibé sira sei la hala’o knaar hirak ne’ebé sira labele hala’o tanba de’it sira nia defisiensia. Nune’e mós Estadu wainhira bele, promove protesaun ba sidadaun sira-ne’ebé iha defisénsia, tuir lei haruka” hatutan Dr. Silverio.  

     

    Dr. Silverio dehan “iha tempu balun Estadu presiza dezenvolve promove no fó protesaun ba sidadaun sira ne’ebé defisiensia sira tuir lei ne’ebé vigor iha nasaun timór-Leste”.

    Tuir realidade oras ne’e iha nasaun Timor-Leste, ema ne’ebé defisiente hetan mós oportunidade hanesan ho ema seluk. Ne’e ita bele haree liu husi area disportu, muzika, eskola formal no mós iha area selu-seluk. Ne’e bele hatudu ba nasaun seluk katak, Timor-Leste nasaun foun no indepedensia iha tinan ne’en nia laran, maibé ema defisiente mós hetan oportunidade ne’ebé hanesan ema seluk atu bele dezenvolve sira-nia moris hodi fó kontribuisaun ba ita-nia nasaun doben Timor-Leste.

    Lia na’in iha meza kabuar ne’e reprezentante husi Konshelo Konsultivo PDHJ UNMIT-HRTJS no defisiente.

    Partisipantes iha meza redonda ne’e mai husi Ministeriu Negósiu Estranjeiro no Kooperasaun, Ministeriu Justisa, Diresaun Nasionál servisu sosial, Sekretáriu Estadu Juventudi no Desportu, Direitur Disable People Organization Distritu Dili, Assert, Ahisaun, Katilosa, Klibur Domin Tibar, Klinika Uma Ita Nian, Fuan Nabilan, ETBU, Misaun Lepra iha Timor-Leste no Responsavel Sentru Formasaun ba Ema Defisientes sub distritu Laleia no reprezentantes UNMIT-HRTJS.

    Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali justisa.

     

    Presiza informasaun Kontaktu

    Lady Ximenes

    Informasaun & Relasaun Públika PDHJ

    Telemovel 726 1843 ou 333 1071