Date : 02-03-2012
Dili – Relasiona ho atividade kampanha ne’ebe prevee ona iha orariu CNE nian mak ekipa Monitorizasaun Direitus Humanus hala’o ninia knar monitorizasaun iha loron 29 Februari, fatin Merkadu Bansone- Noafafo, Suco CUNHA no Suco Naimeko Sub-Distritu Pante Macassar Distritu Oecusse. Tuir rejultadu monitorizasaun husi PDHJ iha Oe-cusse katak situasaun em geral iha kampana lao ho diak.
Maske nuneé monitor PDHJ iha Oe-cusse hetan katak iha funsionariu publiku (mestre) partisipa iha tempu kampana. Depois de relatoriu ne hasai seidauk iha konfirmasaun husi parte eskola, katak mestre ne hetan lisensa ou autorizasaun.
Iha loron 01 Marsu 2012, Merkadu Bansone – Noafafo, Suco Cunha Sub-Distritu Pante Macassar Distritu Oecusse, iha kareta no mototrizadas balun hasai tiha númeru Sapa no monitor sira la bele detekta, maibe hetan duni katak iha funcionariu balun uza duni patrimoniu Estadu nian balun ba aktividade Kampaña politika partidu nian. Hateten husi Provedor Interino Dr. Rui Pereira dos Santos.
Tuir rejultadu intervista monitor PDHJ ho Gabinete Sekretariu Estadu Regiaun Autonoma Oecusse (SERAO), Sub-Distritu Pante Makasar informa katak iha funsionariu balun ne’ebe involve an iha kampanha sem iha lisensa husi komisaun Funsaun Publika.
Entretantu ekipa monitorizasaun PDHJ iha distritu Liquisa iha loron 29 Fevereiru 2012 hatoó katak hetan duni asset estadu nian ne’ebe para iha momentu ne’eba iha kampanha kandidatura Dr. Jose Ramos Horta maibe monitor PDHJ labele detekta sapa motor hirak neébé apoiantes sira uza. Maske nuneé monitor so detekta deít maka motor balun neébé sefi suku sira uza hanesan Motor ho sapa 50.89 G, 47.18 G, 466 G (numeru iha kotuk laiha).
Ekipa monitor nota katak iha motor ho sapa estadu nian barak maka uza husi simpatizantes sira maibe monitor labele detekta tanba apoiantes sira neébé uza motor estadu sira hasai tiha sapa kotuk no oin (no sapa laiha).
Provedor interino hateten katak bazeia ba rejultadu monitorizasaun maka iha PDHJ sei hasai rekomendasaun ba orgauns kompetentes bazeia ba faktus neébé PDHJ hetan iha terenu.
Iha sorin seluk, Dr. Rui apela ba funsionariu sira maka fó apoiu ba kandidaturas Presidente Republika ba tinan 2012 toó tinan 2017 atu labele utiliza patrimonia estadu tuir lei haruka.
Presiza informasaun kontaktu, Lady Ximenes, 7304260. Dircia Xavier, 7119725 no Jose Tefa, 7351412