Country Representative World Bank Hala’o Audensia Ho Provedor de Direitos Humanos e Justiça, Virgílio da Silva Guterres
Dili: Loron, 21 Março 2024, Country Representative World Bank, Mr. Bernard Harborne hamutuk ho nia ekipa Social Accountabilyty, marka prejensa iha Instituisaun dos Direitos Humanos e Justiça, hodi enkontru ho Provedor de Direitos Humanos e Justiça, Virgílio da Silva Guterres “Lamukan” ho nia ekipa.
Iha sorumutu ne’e koalia liu kona-ba, Banku Mundial nia observasaun liga ho dezenvolvimentu rai laran relasiona ho asuntu direitus umanus nian, hanesan asesu ba edukasaun, saude, no dezenvolvimentu rai.
Alende ne’e ekipa husi Banku Mundial mós informa ba Provedor katak, sira kompleta ona sira nia diagnosa kona ba akontabilidade sosial hamutuk ho sira nia parseiru implementador. Oinsá mak sei hala’o operasaun balun kona-ba envolvimentu projeitu pilotu nian. No sira nia parte mós sei halo konsultasaun ho altu nivel sira no ONG ne’ebé maka ativu iha seitor Saude. Sira mós involve Parseiru dezenvolvimentu komunidade hodi identifika elementu xave ne’ebé relevante hodi konsidera. No elementus ida maka atu foka ba nivel komunidade, no saida maka akontese iha terenu. Ne’eduni presija servisu hamutuk entre PDHJ no Banku Mundial nian hodi hamutuk hare ba isue hirak ne’e.
Entretantu husi parte PDHJ mós fahe sira nia informasaun kona ba mandatu pdhj nian hodi proteje no promove direitus umanus no promove governasaun di’ak, liu husi diskusaun ida ne’e ikus mai detekta katak mandatu PDHJ nian mós sei relasaun ho apoiu ba projeitu balun husi Banku Mundial nian. Tanba ne’e iha tempu badak sei iha posibildade atu servisu hamutuk entre parte rua hodi proteje direitus umanus no governasaun di’ak.
Audensia de enkontru ne’e rasik realiza iha Sala Biblioteca PDHJ, Caicoli, ne’eb’e partisipa mós husi Provedor Adjunta Direitus Umanus, Sra. Maria Marilia X. C. de O. da Costa, Sekretariu Ezekutiva, Sr. Ambrosio Graciano Soares, Chefe Unidade Asistensia Juridika, Administrativa e Pesquisa, Sra. Filomena Dias ho Asesor Legal, Sr. José Antonio.