• Diseminasaun Kna’ar PDHJ, CAC, IJE no KFP Ba Funsionariu Públiku MAE

    Dili– iha loron 29 Marsu 2016, Provedoria dos Direitus Humanus e Justiça (PDHJ) Diresaun Boa Governasaun, Departamentu Promosaun no Edukasun, servisu hamutuk ho Comisaun Anti-Corrupsaun (CAC), Inspesaun Jeral Estadu (IJE) no Komisaun Funsaun Públika (KFP), realiza workshop nasional ba funsionariu públiku Ministério Administrasaun Estatal ho tema “Prevene no Kombate Korupsaun, hodi Promove Governasaun Di’ak no Proteje Direitus Humanus iha servisu Administrasaun Públiku nian”, iha salaun Ministério Solidariedade Social Caicoli-Dili

    Objetivu workshop ne’e atu disemina informasaun kona-ba papel PDHJ, CAC, IJE no KFP ba funsionarius sira iha Ministério Administrasaun Estatal, atu nune’e funsionarius sira bele hatene diak liu tan kona-ba servisu husi instituisaun hirak ne’e.

    Provedora Adjunta ba área Governasaun Di’ak, Dra. Jesuina Maria Ferreira Gomes, MPA iha ninia aprezentasaun materia hateten ba partisipantes sira katak, PDHJ nia kna’ar atu hare’e no buka hatán sidadaun sira nia keixa hasoru poderes públiku. Kompetensia PDHJ nian mak atu halo investigasaun, edukasaun no promosaun, monitorizasaun no advokasia. PDHJ sei avalia kesar sira, hala’o investigasaun no hato’o rekomendasaun ba órgaun kompetente, tuir estatutu PDHJ lei nu 7/2004.

    Iha fatin hanesan, Secretário Estadu Administrasaun Estatal Sr. Samuel Mendonça iha abertura ba atividade workshop ne’e, husu ba partisipantes sira atu aproveita oportunidade ida ne’e ho diak hodi hatene diak liu tan servisu husi instituisaun PDHJ, CAC, IJE no KFP, no mos enkora nafatin ba partisipantes sira atu rona didiak esplikasaun materia hirak ne’ebe fasilitador sira esplika.

    Iha atividade workshop ne’e fahe ba sesaun rua, sesaun dahuluk, Provedora Adjunta ba area Boa Governasaun, Dra. Jesuina Maria Ferreira Gomes, MPA,  esplika kona-ba papel PDHJ nian, Xefi Departamentu Promosaun no Edukasuan Direitus Umanus, Sra. Rosalina de Jesus Pires, esplika kona-ba direitus umanus, Xefi Departamentu Promosaun no Edukasuan, Sra. Margarida Francisca J. M. dos Santos, esplika kona-ba prinsipius boa governasaun, Diretur Asistensia Públika, Sr. Silvino Saldanha Pereira, esplika kona-ba prosesu hato’o keixa ba PDHJ no Inspetor Jeral Estadu, Sr. Francisco de Carvalho, esplika kona-ba papel husi Inspesaun Jeral Estadu. No iha sesaun daruak nian mak Comisario Comisaun Anti Corupsaun, Sr. Duarte Tilman, esplika kona-ba papel CAC nian no Prezidente Komisaun Funsaun Públika, Sr. Faustino Cardoso Gomes, esplika kona-ba papel KFP nian.

    Partisipantes ne’ebé partisipa iha eventu ne’e mak Diretur Jeral, Diretur Nasionais, Diretus Distritais, Xefi Departamentus, Xefi Sesaun no ofisiais iha Ministério Administrasaun Estatal.