DPE-BG Entrega Relatoriu Treinamentu Konjunta ba Instituisaun PDHJ, IJE no MS

Dili- Relasiona ho atividade treinamentu konjunta ne’ebé hala’o ona iha tinan 2015, entre Provedoria dos Direitos Humanos e Justiça (PDHJ), Inspesaun Jeral Estado (IJE) no Ministério da Saúde (MS) ba dala uluk (I) realiza tiha ona kapasitasaun ba kargus diresaun, Xefias no professional saúde Munisipiu 12 inklui Rejiaun Administrativa Espesial Oe-cusse Ambeno (RAEOA).

Iha loron 29 Marsu 2016, Departamentu Promosaun no Edukasaun Diresaun Boa Governasaun realiza mini seminariu ho objetivu atu públika relatoriu treinamentu konjunta iha tinan 2015 nian, entrega relatoriu treinamentu ba superior sira iha instituisaun PDHJ, IJE no MS no mos reprezentante Diretores husi Munisipiu 12 inklui RAEOA, no iha oportunidade ne’e mos halo renovasaun assinatura akordu servisu konjunta entre PDHJ, IJE no MS ba tinan 2016 nian.

Dr. Silverio Pinto Baptista, Provedor iha abertura hateten katak, koperasaun servisu entre instituisaun PDHJ, IJE no MS ho intensaun atu promove prinsipiu boa governasaun ba kargus diresaun no xefias sira iha Ministério da Saúde.

Aliende ne’e, Provedor husu ba kargus diresaun no xefias sira ne’ebé hetan ona oportunidade tuir formasaun ida ne’e bele hala’o kna’ar ho diak, tanba nudar funsionariu públiku ne’ebé servisu iha administrasaun públiku sai hanesan servidor do povu iha nasaun ida ne’e.

Provedor esplika ba partisipantes sira iha mini seminariu ne’e katak, dever ida husi instituisaun PDHJ iha area boa governasaun nian tenki buka kopera ho instituisaun hotu-hotu atu bele fó formasaun ba servidor do estado hotu hodi servi povu ho diak.

Iha fatin hanesan, Diretur Boa Governasaun, Jose Manuel Fereira, aprezenta relatoriu jeral treinamentu konjunta ne’e ba partisipantes sira. Iha aprezentasaun ne’e, Diretur Boa Governasaun esplika katak, durante treinamentu konjunta ba kargus diresaun no xefias iha MS iha Munisipius iha vantajen no dezafius.

Vantajen husi treinamentu ne’e mak dirijente sira transforma-an no kompriende kona-ba oinsá bele jere administrasaun ho di’ak, efikaz no efisiente, no mos partisipante sira iha duni koñesimentu no kompriende kona-ba servisu instituisaun PDHJ, IJE no MS.

No mos nia dezafius mak hamosu insatisfasaun ba partisipante sira balun, tanba la konsege espresa sira nia dúvidas kona-ba matéria ne’ebé aprezenta husi fasilitadór sira relasiona ho tempu ne’ebé la sufisiente no mos durante implementasaun programa treinamentu konjunta ne’e hatudu katak seidauk bele fó garantia no asegura balansu jéneru entre mane-feto tanba kargu xefia sira iha eskola maioria mane mak okupa.

Iha oportunidade ne’e, Adjunta Provedor ba área Boa Governasuan Sra. Jesuina M. F. Gomes MPA entrega simbolikamente relatoriu jeral treinamentu konjunta tinan 2015 ba superior sira iha Instituisaun PDHJ, IJE no MS.