• Dr. Sebastião: loron internasional feto sai importante wainhira mane sira fo valor ba feto

    Data, 10-03-2010

    Loron Internasionál feto 08 Marsu sai importante wainhira mane sira fó valor ba feto sira no rekoñese sira nia direitu. Lia hirak ne’e hato’o husi Dr. Sebastião Dias Ximenes, Provedor wainhira selebra loron internasionál feto  8 Marsu 2010 iha Welaluhu distritu Manufahi.

    “Ho selebrasaun loron feto iha Welaluhu PDHJ hakarak atu hakbesik-an liu tan ba komunidade liu-liu komunidade Fatuberliu” hateten Dr. Sebastião.

    Hodi selebra loron importante ne’e PDHJ fahe informasaun ba feto sira iha área rural hanesan focal point iha distritu Manufahi no sub distritu Fatuberliu, feto husi sub distritu seluk iha distritu Manufahi inklui reprezentante feto husi suku no reprezentante estudante sira liu husi workshop loron ida.

     Administradór distritu Manufahi Filomeno Tilman “agradese tebes ba Provedor ho nia komitiva ne’ebé bele selebra loron internasionál feto hamutuk ho komunidade iha Welaluhu, tanba loron ne’e nu’udar loron ne’ebé importante ba feto sira iha mundu tomak liu-liu ba feto sira iha aria rural hanesan feto sira iha Welaluhu”.

    PDHJ hanesan órgaun indepedente ne’ebé iha knaar atu protégé no promove Direitos humanos liu husi kampaña de informasaun nune’e ema hotu bele hatene no respeita Direitos humanos sidadaun sira nian.

    Presiza informasaun Kontaktu

    Lady Ximenes

    Offisial Informasaun & Relasaun Públika PDHJ

    Telemovel 7304260 ou 333 1071