Navigation

Distritu Manatutu-Provedoria dos Direitos Humanos e Justiça (PDHJ), liu husi Diresaun Nasional Direitus Humanos, Departamentu Promosaun no Edukasuan, kontinua fó treinamentu ba membru sira Polisia Nasional Timor-Leste (PNTL) iha Distritu Manatutu. Treinamentu ne’e hala’o durante loron ha’at hahu husi loron 16-19 Setembru 2014, iha salaun PNTL Manatutu.

Dr. Rui Pereira dos Santos, Provedor Adjunto ba area Boa Governasaun, iha sesaun abertura hateten aprende matenek la iha limitasaun tempu, nune’e enkoraja no husu ba partisipante sira atu partisipa treinamentu refere ho seridade durante treinamentu hala’o.

Dr. Rui hatutan katak, liu husi treinamentu ne’e hodi hakbi’it membru PNTL sira. Tan ne’e husu ba membru PNTL sira atu servisu hamutuk hodi nune’e iha futuru bele lidera instituisaun PNTL ho di’ak no profesional.

Dr. Rui rekoñese katak, treinamentu ba membru sira PNTL iha Distritu Manatutu nu’udar treinamentu kontinuasaun iha tinan kotuk. Tanba ne’e husu ba PNTL hodi hametin nafatin servisu hamutuk entre PDHJ no Instituisaun PNTL.

Iha fatin hanesan, Komandante Interino PNTL Manatutu, José Casimiro de Carvalho hato’o nia agradesimentu ba PDHJ, tanba bele kapasita membru PNTL iha Distritu Manatutu kona-ba direitos humanos.

Jose rekoñese katak informasaun husi tempu ba tempu sempre iha mudansa nune’e presiza tebes membru PNTL hodi haklean sira-nia koñesimentu kona-ba direitus umanus hodi nune’e bele hala’o knaar hanesan servidor povo no nasaun ho di’ak no profesional.