• EE dala 17, PDHJ-DT Oe-cusse halo monitorizasaun iha Portu Iwao Kitahara Mahata Oe-cusse

    Oe-cusse : Iha loron 23 Setembru 2021, Ekipa Fiskalizador PDHJ DT Oé-cusse halo monitorizasaun ba portu IWAO Kitahara Mahata RAEOA, nota katak; pasajeiru sira ne’ebé atu halo viajen husi RAEOA ba Dili, menus no ladún barak hanesan fulan kotuk, liga ho EE-17 wainhira Presidente Repulika dekreta Estadu Emerjénsia ba loron tolu nulo tan ho dekretu lei Presidente № 69/2021, 24 fulan Agostu-ne’ebé hahú husi loron 31 fulan Agostu no remata iha loron 29 fulan Setembru Tinan 2021.

    Aleinde ne’e tuir observasaun Ekipa Fiskalizador nota mós katak; Roo ahi Maritima Bintang Samudra 8, tula sasán ka material nomos pasajeiru balun husi Dili mai Oe-cusse iha loron 22 no fila fali husi Oe-cusse ba Dili iha loron 23 fulan Agostu 2021. Entretantu pasajeiru balun informa katak; antes halo viajen husi Dili mai Oe-cusse, Ekipa vijilánsia ba Covid-19 no Sentru Integradu Jestaun Krise (CIGC), autoriza sidadaun sira ne’ebé mak simu ona vasina kompletu no ba sidadaun sira ne’ebé mak foin simu vasina ba premeiro doze bele halo viajen maibé tenki kumpri auto-kuarentena durante loron lima (5). Ekipa Fiskalizador PDHJ DT Oé-cusse nota mós katak; falta Fasilidades prevensaun ba surtu Covid -19, hanesan Bee moos no sabaun iha Roo ahi laran.

    Responsavel Portu informa katak; Ro’o ahi Bintang Samudra halao operasaun semana ida dala ida, iha loron Kuarta – feira husi Dili mai Oé-cusse no loron Kinta- feira husi Oé-cusse fila ba Dili. Membru Polisia Nasionál Timor Leste (PNTL) husi Unidade Polisia Maritima (UPM) destakadu iha Portu refere, atu asegura implementasaun regras Estadu Emerjénsia iha Portu IWAO Kitahara Mahata RAEOA. Maioria pasajeiru Ro’o ahi Bintang Samudra mak negosiante sira ne’ebé mak hola material ka sasán husi Dili mai iha Oé-cusse.

    Aliende ne’e iha sidadaun balun ne’ebé mak halo atividade negósiu iha areadores portu nian, transporte públiku hanesan Mikrolet, Ojek no Roda tolu (Tum-Tum) kontinua halao operasaun ba iha Portu atu tula pasajeiru sira husi Portu ba iha sira nia hela fatin.