Dili: Loron, 26 Março 2024, Estudante 40 kompostu husi Feto no Mane, hetan disseminasaun husi formador Provedoria dos Direitos Humanos e Justiça (PDHJ) kona-ba, proteje direitus umanus no promove governasaun di’ak.
Liu husi abertura no fahe materia iha disseminasaun ne’e, Sekretariu Ezekutivu, Sr. Ambrosio Graciano Soares, apela ba estudante sira atu partisipa ho ativu iha disseminasaun ne’e tanba, sira maka sai hanesan estafeta ida ne’eb’e maka sei troka fali mestre sira, no ukun nain sira seluk iha futuru.
Nia espera ho sorumutu badak ida ne’e estudante sira bele akapta netik informasaun ruma liga ba proteje no promove direitus umanus nian. Nune’e bainhira iha violasaun ruma ne’ebé liga ba asuntu direitus umanus nian, estudante sira bele hatene ona saida maka sira presija atu halo no atu keixa bai ha entidades sira ne’ebé.
Entretantu direitu ba estudante sira signifika katak, estudante sira iha direitu atu asesu ba edukasaun ne’ebé maka di’ak, iha direitu atu hetan materia husi Professores sira. Professor sira mós iha dever atu labele abandona aula durante prosesu aprendijazen tanba ne’e viola direitu estudante sira nian hodi asesu ba materia.
Sekretariu Ezekutivu husu mós ba estudante sira atu habelar materia sira ne’ebé maka sira hetan husi disseminasaun ne’e ba iha familia, kolega no komunidade.
Alende ne’e formador sira husi PDHJ lori mós materia kona-ba, direitus umanus, trafiku umanu, papel PDHJ, nomos Igualdade Jeneru.
Tanba PDHJ nudár instituisaun nasionál direitus umanus Timor-Leste nian, orgaun independente ne’ebé hari’i atu proteje direitus umanus no promove governasaun di’ak sei alkansa nia objetivu liu husi, edukasaun, promove kooperasaun, rezolusaun, no investigasaun, peskiza no monitorizasaun.
Iha fatin hanesan Koordenador Escola, Sr. Domingos Ramos, lori estrutura no estudante sira nia naran hato’o agradese wain ba disponibilidade PDHJ nian hodi fahe informasaun relasiona ho papel PDHJ liga ho direitus umanus no governasaun di’ak ba estudante sira iha Escola Secundaria Geral Paralelo Maubara. Espera formasaun ne’e labele remata de’it iha ne’e maibe tenke fahe mós ba eskola sira seluk. No sujere mós ba PDHJ atu karik bele kada tinan ho eskola ne’ebé maka hanesan tenke fó formasaun dala rua.
Iha sorin seluk husu ba estudante sira atu materia ne’ebé maka hetan husi Formador PDHJ sira labele remata de’it iha eskola fatin maibe tenke habelar mós ba kolega, familia no sosiedade sira ne’ebé maka hamrook hela ba informasaun sira hanesan ne’e.
Atividade sensibilizasaun ne’e rasik realiza iha Escola Secundaria Geral Paralelo Maubara, ho partisipasaun masimu husi estudantes sira.