Funsionario Foun PDHJ Tuir Formasaun
Date : 23-05-2012
Dili – Molok atu hala’o funsaun hanesan servidor povo no estadu iha nasaun demokratiku ne’e, Funsionariu Públiku (FP) foun ne’ebe foin hetan rekrutamentu husi Komisaun Funsaun Públiku (KFP) iha tinan kotuk hodi hala’o servisu iha Instituisaun Provedoria dos Direitus Humanus no Justisa (PDHJ) tuir programa formasaun durante loron 3 hahu husi loron 14 to’o 16 Maiu 2012 iha edifisiu PDHJ Caicoli-Dili.
Objectivu husi programa formasaun ne’e, atu fo koñesimentu ba funsionarius foun sira konaba servisu no mos vantajen no disvantajen iha instituisaun nian laran molok funsionariu sira desloka ba area servisu ida-idak nian tantu atu hala’o servisu iha nasional no iha Sede Regional hanesan ba Distrito Baucau, Manufahi, Bobonaro no Distrito Oe-cusse.
Materia ne’ebe funsionarius foun sira simu iha programa formasaun ne’e hanesan papel husi direitor jeral, prosedimentus administrativus, direitus umanus baziku, prinsipius boa governasaun, mandatu boa governasaun husi estatuto PDHJ, aktividades investigasaun no prosesu investigasaun ba kazu violasaun direitus umanus, aktividades investigasaun no prosesu investigasaun ba kazu abuzu de poder iha administrasaun públiku, aktividades monitorizasaun no advokasia, aktividades promosaun eduksaun iha area direitus umanus, kna’ar diresaun asistensia públika no prosesu simu keixa, servisu diresaun administrasaun finansas, servisu aprovisionamentu, servisu lojístika no servisu husi relasaun públika.
Provedor de Direitus Humanus no Justisa (PDHJ) Dr. Sebastião Dias Ximenes iha seremonia abertura hateten katak, programa formasaun hanesan passu importante ba funsionarius foun sira atu hatene konaba servisu iha instituisaun ne’e no liu-liu presiza hatene konaba area spesifiku kada diresaun iha instituisaun nian.
Provedor mos hateten ba funsionariu foun sira katak, instituisaun PDHJ hanesan instituisaun independente ho nia funsaun atu proteje no promove direitu sidadaun sira nian no mos atu promove governasaun diak iha nasaun demokratiku ne’e.
“Tamba ne’e, husu ba funsionarius foun sira atu hala’o servisu tantu iha nasional no mos sira ne’ebe atu ba hala’o servisu iha Distrito tenke hatudu disiplina iha servisu fatin no mos husu atu atende didiak komunidade sira wainhira sira atu hato’o sira nia keixa”, sujere Provedor.
Iha fatin hanesan, Presidente Komisaun Funsaun Publiku (KFP) Eng. Liboria Pereira, MIM husu ba funsionarius foun sira ne’ebe atu servisu iha instituisaun ne’e tenke hatudu servisu ho responsabilidade no imparsialidade.
“Tamba hanesan ita hotu hatene katak PDHJ hanesan instituisaun independente ne’ebe ho nia funsaun atu tau matan no kontrola lalaok servisu administrasaun publiku no mos atu proteje no promove direitu cidadaun nian”, hateten Presidente Komisaun Funsaun Publiku ba funsionarius foun sira wainhira esplika konaba papel funsionarius publikus bazeia ba estatutu Funsaun Publiku.
Liborio mos hateten ba funsionarius foun sira atu servisu ho onestidade no mos tenke atende didiak cidadaun sira wainhira cidadaun sira atu aprezenta sira nia keixa.