Date, 22-09-2008
Funsionáriu Provedoria dos Direitos Humanos e Justiça (PDHJ) husi diresaun direitus umanus sei tuir estájiu kona-ba monitorizasaun nian iha Komisaun Direitus Humanus Filipinas nian hahú husi loron 19 Setembru durante fulan ida.
“Objetivo husi estájiu ne’e atu kria oportunidade ida ba PDHJ atu aprende husi instituisaun nasionál direitus umanus (INDU) sira seluk kona-ba sira nia sistema no prosedimentu sira hodi hala’o monitorizasaun, Direitos Humanos no servisu parseria ho sosiadade sivíl, hateten Dr. Sebastião Dias Ximenes, Provedor.
Funsionáriu PDHJ ne’ebé sei hola parte iha estájiu ne’e mak hanesan Silvino Saldanha Pereira, Antoninho da Silva no Maria Verdial husi NGO Fundasaun Moris Foun Rede monitorizasaun (Network) PDHJ nian husi Maliana.
Estajiàriu Silvino Saldanha Pereira hateten ”ha’u espera katak depois de estájiu ha’u bele kontribui hodi hadi’a instituisaun PDHJ liu husi atividade monitorizasaun ho kualidade ne’ebé di’ak”.
Programa estájiu ne’e nu’udar parte husi programa kapasitasaun Direitus Umanus PDHJ nian husi projetu UNDP no OHCHR. Molok estajiàriu sira tuir estájiu iha Filipinas sira tuir ona kursu intensivu ingles iha Timor-Leste.
Durante estájiu iha Filipinas estajiàriu sira sei involve direitamente iha Instituisaun Direitus Umanus Filipinas nia atividade hanesan orientasaun kona-ba podér no funsaun sira husi instituisaun direitus Umanus Filipinas, vizita ba kadeia sidade no munisipál, vizita kadeia iha penitensiária nasionál no sentru detensaun joven nian no diskusaun kona-ba sistema internal nian.
Kooperasaun entree PDHJ no Komisaun Direitus Umanus Filipinas nian ne’e ba dala tolu ona. Iha tinan 2007, Komisariu no Direitur husi instituisaun ida ne’e mai iha Timor-Leste hodi halo treinamentu kona-ba edukasaun direitus umanus no treinamentu kona-ba edukasaun sivika.
Presiza informasaun kontaktu
Lady Ximenes, Informasaun & Relasaun Públika PDHJ
HP, 7304260 ou 333 10701