Dili- Provedoria dos Direitus Humanus e Justiça (PDHJ) liu husi Diresaun Boa Governasaun, Departamentu Promosaun no Edukasun, iha loron 24 Marsu 2015 kontinua sosializa kna’ar PDHJ ba Lideransa no Funsionariu Públiku iha Ministério Comercio Industria no Ambiente (MCIA) iha Salaun Delta Nova Comoro-Dili.
Provedor, Dr. Silverio Pinto Baptista iha aprezentasaun materia konaba kna’ar PDHJ nian husu ba Lideransa no Funsionariu Públiku husi MCIA atu servisu ho responsabilidade tanba instituisaun Provedoria hanesan instituisaun ne’ebé kontrola ba atividades husi governantes sira nian.
Provedor esplika tan katak, mandatu husi Provedoria mak atu proteje no promove direitus humanus no promove boa governasaun, no ho nia natureza servisu atu fiskalizasaun no advokasia, promosaun no edukasaun no halo investigasaun. Husi rezultadu investigasaun ne’ebé halo, PDHJ sei la hola desizaun maibe hato’o de’it rekomendasaun ba Ministério relevante sira no ikus hato’o rekomendasaun ba Parlamento Nasional.
Iha aprezentasaun materia, Provedor dehan ba partisipantes sira katak, iha lei mos hateten katak instituisaun PDHJ iha kna’ar importante ida atu tau matan ba servisu funsionariu públiku hotu no laos deit tau matan no investiga deit, maibe hare mos ba buat ne’ebe lao iha administrasaun públiku la tuir lei ne’ebé iha presiza kolabora hamutuk hodi hadia.
Aliende koalia konaba kna’ar Provedoria nian, Provedor mos esplika konaba importansia direitus humanus tanba ita nudar servidor estadu persiza mos hatene kona-ba saida mak violasaun direitus humanus no saida mak krime, no sei mak sai autor ba violasaun direitus humanus no krime ne’e.
Depois esplika kna’ar Provedoria nian no importansia direitus humanus ba partisipantes sira, Provedor enkoraja nafatin ba ema hotu inklui funsionariu tomak katak, odamatan PDHJ nakloke ba sidadaun hotu inklui mos funsionarius públiku sira atu hato’o sira keixa, bainhira sente katak iha entidades balun viola sira nia direitu.
Iha sesaun sosializasaun ne’e, Director Boa Governasaun, Sr. José Manuel Ferreira esplika kona-ba Prinsipius Governasaun Di’ak, Xefi Departamentu Promosaun no Edukasuan Sr. Paulo Ribeiro esplika kona-ba saida mak Tipu Violasaun Governasaun Di’ak no Xefi Departamentu Hare Tuir Rekomendasaun Sra. Laurina Nessi koalia kona-ba dalan oinsa hato’o keixa ba PDHJ no oinsa prosesu hare tuir rekomendasaun sira ne’ebé PDHJ rekomenda ona ba Ministerio kompetentes.
Iha atividade ne’e, iha oradores husi Comisario Comissaun Anti Corrupsaun (CAC), Dr. Aderito António Pinto Tilman no Inspektor Jeral Estadu (IJE) Dr. Francisco de Carvalho. No atividade refere realiza tanba servisu hamutuk entre PDHJ no Ministerio Comercio Industria no Ambiente (MCIA).