• Genebra, 8 Maiu 2024 – Provedór Direitus Umanus no Justisa, Virgílio da Silva Guterres ‘Lamukan’, Adjunta Direitus Umanus, Maria Marilia X. C. de O. da Costa ho Diretóra Promosaun Marina Bernadina Gaio, durante loron tolu husi 6 to’o 8 Maiu 2024, partisipa iha enkontru anuál GANHRI 2024 iha Asembleia Jerál ONU iha Genebra.

    Iha loron dahuluk, 6 Maiu 2024 Provedór Direitus Umanus no delegasaun partisipa iha reuniaun Rede Rejionál Asia Pacific Forum (APF), prezide husi Doohwan Song, Prezidente Rejionál, Ásia-Pasífiku. Iha reuniaun ne’e aborda prioridade tolu; Atualizasaun Relatóriu Anuál APF ni’an, Planu Anuál APF no Konferénsia Anuál tinan 2024, hodi submete ba iha enkontru GANHRI loron daru’ak ni’an.

    Iha loron daruak, Provedór ho delegasaun partisipa iha Asembleia Jerál, prezide husi Maryam Al Attiyah, Prezidente GANHRI iha Palásiu Nasoins Unidas ni’an, hodi partilla koñesimentu kona-ba prátika di’ak sira. Iha loron ikus husi  Konferénsia Anuál GANHRI ni’an taka ho diskusaun kona-ba negósiu no direitus umanus.

    Partisipasaun ida-ne’e subliña Timor-Leste nia pozisaun proativu kona-ba asuntu direitus umanus no ninia dedikasaun atu kontribui ba diálogu ida-ne’ebé signifikativu iha nível globál.

    Iha rohan husi Konferénsia Anuál GANHRI nian, Provedór no Adjunta hasoru malu hodi hato’o agradesementu ba Sekretária GANHRI Amina Bouayach, Reprezentante GANHRI iha Geneva Katharina Rose, no Cynthia Radert, Ofisiál Direitus Umanus NIRMS-OHCHR ni’an.