Guvernu Switzerland Kontinua Apoiu Servisu PDHJ

Dili : Loron, 1 Junho 2022, Provedora Jesuina Maria Ferreira Gomes,MPA, akompanha husi Sekretariu Ezekutivu, Sr. Ambrosio Graciano, Xefe Gabinete, Sr. Silvino Saldanha Pereira no tekniku Espesializada, Sra. Olga Vilanova Sequeira, sorumutu ho Ambassador Switzerland, Sr. Kurt Kunz ho nia primeiru sekretariu hodi koalia kona-ba prosesu kooperasaun entre Switzerland ho PDHJ iha area prevensaun tortura iha Timor-Leste, hanesan implementasaun Manual ba Guarda Prizaun nomos treinamentu TOT ba Funsionariu Ministeriu Justiça no PDHJ no sei halo mós pilotu ba Guarda Prizaun iha Bekora, Gleno no Suai. Tuir planu treinamentu ne’e sei hala’o iha fulan Agostu tinan ne’e.

Ambassador ne’e mos afirma katak, poisibilidade guvernu Switzerland sei kontinua kria kooperasaun iha futuru ho instituisaun PDHJ liu-liu iha area prevensaun nomos edukasaun.

Tanba bazeia ba sira nia observasaun sira nia parte kongratula tebes ho servisu  PDHJ nian ne’ebé konsege atinzi duni nia realizasaun servisu liu-liu iha area Prevensaun tortura nian liu husi MOU no lansamentu Manual Treinamentu ba Guarda Prizional hamutuk ho Ministeriu Justisa no APT.