Halakon Violênsia Hasoru Feto no Labarik Feto Sira

Dili: Loron, 09 Outubro 2023, Provedor de Direitos Humanos e Justiça, Sr. Virgílio da Silva Guterres ‘Lamukan’, partisipa iha Spotlight Iniciative nia semináriu kona-ba “Aprosimasaun Ne’ebé Sensível ba Trauma: Progresu, Dezafiu no Oportunidade Sira iha Instituisaun PNTL (PNTL- VPU no Polísia Komunitária).

Programa Inisiativa Spotlight hanesan programa konjuntu entre Uniaun Europeia no Nasoens Unidas atu Halakon Violênsia Hasoru Feto no Labarik Feto Sira.

Iha Timor-Leste, Inisiativa Spotlight implementada hosi ajênsias lima, hanesan: UNDP, ILO, UNFPA, UNICEF no UN WOMEN ne’ebé iha liña koordenasaun hosi gabinete koordenador rezidente ONU no SEII nia okos.

Parte hosi servisu Inisiativa Spotlight nian, UNDP iha kolaborasaun besik ho instituisaun justisa no PNTL foka ba iha reforsa atu mellora kapasidade institusional hodi bele fornese atendimentu ida ne’ebé mak diak liutan bainhira responde ba kazu sira relasiona ho Violênsia Hasoru Feto no Labarik Feto.

Vizaun jeral Inisiativa Spotlight nian mak, atu Feto no Labarik Feto sira goza sira nia direitu iha moris ida livre hosi violênsia, no Timor-Leste ida ne’ebé mak Inkluzivu no Equitável.

Semináriu ne’e realiza iha Suai Room, Timor Plaza, no hetan partisipasaun hosi Comandante Geral PNTL, Comissário Henrique da Costa, Comandante PNTL Munisípiu sira, reprezentante UN Women, Deputada Aliança de Araújo, inklui Corpos Diplomáticos no representantes  ONG.