Data, 29-08-2007
Hodi hasa’e kapasidade Polisia Nasional Timor-Leste liu-liu PNTL husi distritu Aileu Provedoria dos Direitos Humanos e Justiça (PDHJ) servisu hamutuk ho Gabinete Asesoria Direitos Humanos ba Primeiru Ministru, sosiadade sivil hanesan Asosiasaun HAK no Fokupers inklui unidade direitos humanos UNMIT nian hala’o treinamentu ba membros PNTL iha Distritu Aileu. Treinamentu ne’ebé hala’o durante loron tolu hahu husi 27 to’o 29 Agosto ne’e partisipa husi membros PNTL Aileu kuaje ema nain 25 kona-ba Direitos Humanos no Lei.
“Adjunto Provedór ba area direitos humanos Dr. Silverio Pinto Baptista hateten katak presiza no importante tebes ba instituisaun PNTL ho nia membro sira atu aumenta no haklean liu tan kuinesimentu iha parte Lei no Direitos Humanos ba kada membros PNTL ida-idak atu nune’e sira bele hala’o sira nia knaar no funsaun ho di’ak liu tan”.
PNTL hanesan instituisaun ida importante ne’ebé garante ona iha konstituisaun RDTL Artigu 147 hanesan autor ba defende prinsipiu no valores demokrasia, responsavel ba seguransa interna, mantein lei no orde atu protégé direitu fundamental sidadaun ida-idak nian tuir lei ne’ebé vigora iha Timor-Leste.
“Dr. Silverio hatutan liu husi treinamentu ne’e atu aumenta liu tan kapasidade no kuinesimentu membrus PNTL nian iha parte lei no mos iha parte Direitos Humanos hodi bele ajuda liutan membros polisia sira kuinesimentu bainhira hala’o sira nia knaar no funsaun iha terenu”.
Fasilitator iha treinamentu ne’e mak hanesan Silverio Pinto Baptista Adjunto Provedór ba area Direitos Humanos PDHJ, Aniceto Neves husi Asosiasaun HAK, Dr. Joaquim Fonseca no Nelinho Vital husi Asessoria Direitos Humanos ba Primeiru Ministru, Sabino Mendonca husi Unidade Direitos Humanos UNMIT, Maria Jose husi Fokupers no reprejentante husi Akademia Polisia Nasionál Timor-Leste (PNTL).
Materia iha treinamentu ne’e kona-ba Konvensaun Tortura, Konvensaun Sivil Politika, Responsablidade PNTL, Politika uza forsa, Lei órganiku PNTL, Lei Disiplinaria PNTL, Objetivu no prosesu triajen ba PNTL, Istoria Lei Timor-Leste, Kodiku Prosesu Penal Timor-Leste no Violensia bazeia ba jeneru.
“Liu tan Adjunto Silverio hato’o nia espetativa katak ho aprejentasaun materia sira ne’ebé mak hato’o husi orador sira iha treinamentu ne’e, sai nu’udar bukae ida ba membros polisia sira liu-liu Polisia sira iha Aileu atu bele implementa iha pratika servisu loro-loron hodi bele sai polisia ida ne’ebé profesional no imparsial”.
Objetivo husi treinamentu ne’e atu aumenta liu tan kapasidade no kuinesimentu membru sira PNTL nia iha parte Lei no Direitos Humanos hodi bele ajuda liu tan membros PNTL sira bainhira hala’o sira nia knaar no funsaun iha terenu.
Presiza informasaun kontaktu
Lady Ximenes, Informasaun & Relasaun Públika PDHJ HP, 726 1843 ou 333 1071