Hasa’e Kuñesementu Lideransa Komunitaria Suku Lauhata Kona-ba Direitus Umanus no Governasaun Di’ak Liu Husi Diseminasaun
Liquiça : Loron, 25 Jullu 2023, Sekretariu Ezekutivu, Sr. Ambrosio Graciano Soares, halo abertura no lori Materia Boa Governação ba atividade diseminasaun ba Lideransa Komunitaria iha Suku Lauhata, Postu Administrativu Bazartete, Munisipiu Liquiça kona-ba Papel Lideransa Komunitaria liga ho direitus umanus no governasaun di’ak.
Iha abertura Sekretariu Ezekutivu hateten, lori Provedor ho Adjuntu nia naran apresia ho disponibilidade Xefe Suku Lauhata ho nia estrutura tomak ne’ebé maka fó ona tempu ba PDHJ hodi fasilita fahe informasaun ba malu liu husi diseminasaun kona-ba proteje direitus umanus no promove governasaun di’ak.
Tanba ne’e husu ba Xefe Suku ho nia estrutura tomak atu aproveita didiak formasaun ne’e ho partisipasaun masimu durante loron tolu nia laran, tanba formasaun ne’e sei aumenta liutan kuñesementu sira nian hodi respeita ba direitus umanus no governasaun di’ak.
Hafoin halo tiha abertura ba formasaun ne’e. Sekretariu Ezekutivu kontinua kedas ho materia kona-ba mandatu servisu PDHJ nian liga ho direitus umanus no governasaun di’ak.
Iha sorin seluk Xefe Suku Lauhata, Daniel dos Santos mós apela ba nia estrutura no juventude sira atu partisipa ho masimu iha formasaun ne’e, tanba ne’e hanesan oportunidade di’ak ida atu aumenta sira nia kuñesementu hodi respeita ba direitu ema nian no promove governasaun di’ak iha sira nia Suku.
Nia hatutan, maske antes ne’e iha tinan kotuk formasaun hanesan realiza ona maibe ida ne’e oportunidade di’ak ida para bele fanu hela de’it autoridade sira iha suku refere hodi hala’o servisu respeita ba direitu fundamental no prinsipiu boa governasaun ne’ebé iha.