Date, 29-03-2007
K’ordenador IDPs sira iha iha Kapital Dili, Hera, Metinaro no Tibar loron 29 Marsu 2007 hala’o soru-mutu ida ho Comisaun Nasionál Elisoens (CNE), STAE no PNTL.
Enkontru ne’e realiza tanba organiza husi Provedoria Direitus Umanus é Justica (PDHJ) hamutuk ho Redi Monitorizasaun Direitus Humanus (RMDH), ne’ebé durante ne’e hala’o monitorizasaun hamutuk kona-ba direitus humanus iha rai laran, iha área: humanitarian, siguransa no judisiariu ba IDPs sira iha Kapital Dili no distritu sira.
Liu husi enkontru ne’e reprentante IDPs hato’o sira nia preokupasaun relasiona ho iventu nasionál Elisaun Jeral ba Prezidente ne’ebé atu realiza iha loron 9 Abril 2007. Durante enkontru asuntu seguransa mak sai hanesan kestaun importante ne’ebé reprejentante deslokadu sira hato’o. Alien ida ne’e IDPs sira mos kestiona kona-ba deslokadu balun ne’ebé laiha kartau eleitoral ou kartaun eleitoral lakon, nune’e mós presiza monta sentru votasaun iha IDPs sira nia fatin.
Hatan kona-ba IDPs sira nia preokupasaun Domingas Fernandes husi CNE hateten fatores ne’ebé CNE hasoru mak tempo limita tempo servisu CNE no STAE hanesan Lei Eleisaun nian, ekipamentus, osan no selu-seluk tan. Kona-ba Deslokadu sira ne’ebé kartaun eleitoral laiha Domingas hateten ne’e sei sai prekupasaun ba ita hotu maibé resensiamentu tuir kalendariu remata ona iha loron 21 Marsu 2007. Kona-ba sentru votasaun Domingas dehan STAE no CNE labele halo mesak tanba tuir lei klaru ona katak sentru votasaun sei tau tuir fatin ne’ebé identifika ona. Nune’e inposivel atu tau sentru votasaun iha fatin deslokadus nune’e mos kaixa vota la to’o ona atu aumenta. Alien ida ne’e ofisiais eleitoral no brigada sira la to’o no mos tempo besik ona.
Hatan ba prekupasaun IDPs sira nia kona-ba seguransa Inspektur João Belo dos Reis reprejentante PNTL esklarese katak iha ona planu membrus PNTL nain 2 no
membrus UNPOL nain 2 sei halo seguransa iha kada fatin votasaun. Nune’e mos membrus UNPOL no PNTL balu sei halo patrulla iha dalan-dalan inklui forsa Internasionál.
Entretanto iha fatin hanesan reprejentante husi CNE fó opsaun ba reprejentante IDPs sira katak elisaun agora ne’e úniku, tan ne’e deslokadu sira tauk atu ba vota iha sentru votasaun iha Dili laran bele ba vota iha ida-idak nia distritu.
Parte seguransa PNTL fó opsaun katak kuandu deslokadu sira la’o mesak ba sentru votasaun sente ta’uk, deslokadu sira bele organiza halo grupu hafoin mak kontaktu ba UNPOL, PNTL no Forsa Internasionál sira atu ba akompaña deslokadu sira ba to’o iha sentru votasaun.
Presiza informasaun kontaktu
Lady ximenes
Informasaun & Relasaun Públika
No telp 333 1071 ou no telemovel 726 1843