Komunidade la kumpri regras prevensaun Saúde iha atividae Bazar iha Merkadu Vila Nova Munisipiu Baucau

Baucau: iha loron 11 Marsu 2021, ekipa Fiskalizasaun PDHJ Delegasaun Territoriál Baucau, kontinua halo monitorizasaun no observasaun ba atividade komersiante iha bazaar merkadu vila nova, atendimentu públiku iha edifisiu BNCTL Sukursál Baucau no atividade pakotementu iha armajen GOR Baucau. Durante observasaun ekipa haree katak, komunidade barak la iha konsiensia  uza maskara wainhira asesu ba merkadu iha tempu bazár maski ekipa seguransa PNTL no F-FDTL kontinua fó hanoin ba komunidade sira atu mantein uza maskara, maibe la iha fatin fase-liman ne’ebe autoridade sira tau iha fatin públiku espesifiku fatin halibur ema barak hanesan merkadu vila nova.

Iha loron ne’ebé hanesan, ekipa kontinua monitoriza servisu atendimentu iha Banku nasional Komersiu Timor Leste BNCTL Sukursál Baucau, durante observasaun ekipa nota katak, banku prepara fatin fase-liman, taka informasaun kona-ba meus preventivas Covid-19 iha odamatan bot tama edifisiu BNCTL, kliente sira mantein distansia social no kliente sira ne’ebe asesu ba banku refere ladun barak.

Iha sorin seluk ekipa halo mos observasaun ba atividade pakotemenu iha armajen GOR (Ginásiu) Baucau, iha observasaun ne’e ekipa haree katak, ekipa servisu CLN iha armajen refere prepara fatin fase-liman, mantein orienta traballadores sira atu uza maskara iha fatin servisu no kumpri distansia social no atividade distribuisaun cesta bázika kontinua la’o normal hodi distribui sasan CB ba postu Administrativu Laga Suku Samalari nian.