Provedór Direitos Humanos no Justisa sai nu’udar autoridade konstitusionál independente ida ho mandatu atu promove no proteje direitos humanos no boa-governasaun iha Timor-Leste. PDHJ serve nu’udar Instituisaun Nasionál Direitos Humanos no mós nu’udar Provedoria tradisionál ida. PDHJ aprezenta  relatóriu kona-ba ninia atividade ba Parlamentu Nasionál.

PDHJ foka ninia atividade kona-ba violasaun hasoru direitos humanos no kestaun grave sira relasiona ho mal-administrasaun ne’ebé autoridade públika sira halo. Ida-ne’e inklui ospitál públiku sira, eskola públika sira, polísia, militár, governu lokál, membru parlamentu, kualkér funsionáriu ne’ebé Estadu fó dezempeñu no mós kompañia privada sira-ne’ebé nia ativu (asset) maioria governu nian.

PDHJ hala’o funsaun lubuk ida, inklui simu no tau-matan ba kesar sira, halo monitorizasaun ba autoridade públika sira-nia dezempeñu, revizaun ba esbosu lejislasaun nian, husu ba tribunál sira atu halo pronúnsia kona-ba kestaun sira relasiona ho lejislasaun nia konstitusionalidade no implementa atividade edukasionál no promosionál sira.

PDHJ posui podér sira oioin, ne’ebé inklui, entre hirak seluk, podér atu konvoka (fó orden) ba ema no halo sitasaun ba dokumentu sira no tama iha eskritóriu sira no edifísiu sira seluk Estadu nian.

PDHJ mós fornese rekomendasaun sira ba autoridade públika sira nune’e atu asegura kumprimentu tomak ba padraun sira direitos humanos no prátika sira boa-governasaun nian.

Ita-Boot bele download PDHJ nia planu estratéjiku, relatóriu anuál sira, no publikasaun sira seluk iha  biblioteka ba publikasaun sira.