• Monitorizasaun Estadu Emerjénsia-5 iha Suku Buruma no Caibada Waima’a Postu Administrasaun Baucau Vila

    Bauca : Iha loron, 17 Setembru 2020, ekipa monitorizasaun kontinua hala’o observasaun ba servisu atendementu públiku, Autoridade Lokál Suku Buruma no Suku Caibada Uaima’a, iha situasaun EE 5 ne’ebé liga ho autoridade lokál sira nia papél ba implementasaun regras EE nian hodi fahe informasaun ba komunidade sira kona-ba meius prevensaun COVID-19.

    Durante observasaun ekipa nota katak Sedé Suku Buruma, la halo servisu atendementu ba públiku iha oras dader no sedé suku refere taka. Iha sorin seluk, ekipa hare servisu atendementu ba públiku iha Suku Caibada Uaima’a la’o normal.

    Ekipa mos halo entrevista ho Xefé Aldeia Haurobu-Suku Caibada Waima’a, Sr. Miguél Lucio da Costa, informa katak autoridade lokál sira hanesan xefe aldeia, PAAS, no delegadu/a kona-ba prevensaun COVID-19 sempre simu informasaun no orientasaun husi xefe suku hodi fahe nafatin informasaun prevensaun COVID-19 nian ba komunidade hodi kumpre regras hanesan wainhira iha ema ruma tama mai suku refere ilegal no  hetan sintomas COVID-19 atu informa ba autoridade lokál no Saúde hodi halo prevensaun. Xefe aldeia mos informa katak durante EE iha Suku Caibada Waima’a seidauk iha ema ruma maka iha sintomas COVID-19 no tama mai suku refere ilegal husi nasaun seluk.

    Liu husi monitorizasaun ne’e, ekipa fiskalizasaun mos fo hanoin nafatin ba Autoridade Lokál Suku Caibada Uaima’a atu mantein nafatin fahe informasaun ba komunidade sira no prepara kondisaun ne’ebe seguru wainhira halo atendementu ba públiku iha servisu fatin tuir regras prevensaun COVID-19 nian.