Jakarta-Bazeia ba akordu kooperasaun entre Provedoria dos Direitus Humanos e Justiça (PDHJ) no Komisi Hak Asasi Manusia Republik Indonesia (KOMNAS HAM RI) iha loron 19 Setembru 2016, Offisial Investigadores hamutuk ema nain 10 husi Diresaun Investigasaun, Provedora Adjunta no Diretur Investigasaun partisipa iha treinamentu tekniku investigasaun no governasaun di’ak iha Jakarta-Indonesia.
Treinamentu ne’e sei halao durante loron 5 (19-23/9/2016) no formador mai husi instituisaun KOMNAS HAM, Pusat Pendidikan Reserse Kriminal POLRI (PUSDIK RESKRIM), Ombudsman Republic Indonesia (ORI) no ELSAM.
Programa treinamentu loke husi Kepala Biro Dukungan Penegakan HAM (KOMNAS HAM), Johan Efendy. Iha abertura Provedora Adjunta, Jesuina Maria Ferreira Gomes, reprezenta Provedor hato,o agradesimentu barak ba KOMNAS HAM RI tanba ho esforsu tomak bele realiza programa ne’e hodi kapasita offisial investigador sira husi PDHJ.
Entretantu Johan Efendy hateten katak realizasaun treinamentu refere bazeia ba akordu kooperasaun entre PDHJ no KOMNAS HAM RI ne’ebé maka la’o ona iha tinan hirak liu ba no kontinua to’o agora.
Iha akordu kooperasaun ne’e parte rua aseita ona hodi halo mos kapasitasaun ba funsionariu sira husi instituisaun rua (PDHJ & KOMNAS HAM) depende ba nesesidade husi kada instituisaun nune’e iha oportunidade ne’e official investigador sira bele hetan kapasitasaun liu-liu kona-ba esprensia pratika investigasaun.
Materia treinamentu ne’ebé maka formandu sira sei simu durante loron 5 realizasaun treinamentu maka hanesan, konseitu direitus umanus, implementasaun regulamentu nasional no internasional hodi analiza no halo interpretasaun ba violasaun direitus umanus, planu investigasaun, teoria no pratika investigasaun, implementasaun regulamentu nasional no internasional relasaun ho tupoksi Konsellu Imprensa, pratika hodi elabora relatoriu investigasaun direitus umanus no konseitu governasaun di’ak.
Entretantu antes kandidatu formandu sira halo viajen ba Jakarta-Indonesia iha loron 16/9/2016 Aureo Jose Antonio Sávio, Sekretariu Ezekutivu PDHJ hato,o ona ba kandidatu formandu/offisial investigador sira ne,ebe mak partisipa treinamentu refere katak tenke aproveita ho diak no tenki disiplina durante treinamentu hodi nune’e bele fila hikas ba servisu fatin bele implementa iha sira-nia servisu hanesan official investigador. Treinamentu refere finansia husi Fundu Desenvolvimentu Kapital Humano (FDCH).
Instituisaun PDHJ no KOMNAS HAM RI sai ona membru permanente ba Asia Pacific Forum National Human Rights (APF) no South East Asia National Human Rights Institution Forum (SEANF).