• partidu balun sei uza patrimonio do estadu no ladun konsidera cne nia servisu

    Date : 11-06-2012

    Dili – Tuir ekipa monitorizasaun husi Provedoria dos Direitos Humanos e Justiça (PDHJ) ba aktividades kampanha Eleisaun Parlamentar iha Distrito Baucau nota katak, iha partidu politiku balun ne’ebe hala’o aktividades kampaña ladun konsidera servisu Comisaun Nasional Eleisaun (CNE) tamba wainhira atu muda orariu  no fatin kampaña laiha konhesimentu ba CNE Distrito Baucau, tan ne’e susar ba CNE Distrito atu halo observasaun kampaña ne’ebe partidu sira hala’o, nune’e difikulta mos ba PNTL sira hodi garante atividade kampaña.

    Ekipa monitorizasaun hare katak iha aktividade kampaña labarik barak mak partisipa maibe tuir sira nia sasin katak labarik sira rasik mak hakarak  no la iha ema ida mak obriga sira. Nuneé mos ekipa seidauk dekteta  labarik balun partisipa kampaña iha oras eskola tanba kampaña iha semana liu ba hahu iha tempo feriadu ka livre husi prosesu apredisajen.

    Entertantu ekipa monitorizasaun nota katak aktividade kampaña ne’ebe hala’o husi partidu sira sei uza nafatin Patrimonio do Estadu. Hanesan ekipa monitor PDHJ detekta partidu CNRT no KHUNTO iha Distrito Baucau militante no simpatizantes sira sei uza nafatin Patrimonio de Estadu mak hanesan motorizada ho númiru matrikula 2657 utiliza husi simpatizante ou militante husi partido CNRT no motorizada ho númiru matrikula 2503 G utiliza husi simpatizante ou militante husi partido KHUNTO.

    Entretantu iha Distrito Bobonaro ekipa monitorizasaun relata katak kamapaña husi partido PD neébé halaó iha loron 8 Juñu 2012 iha Sub Distrito Balibo, Suco Sanirin, Aldeia Cacun ekipa monitor detekta katak, durante aktividade kampaña milintantes no simpantisantes partidu refere sei utiliza Patrimonio Estadu hanesan motorizada ho númiru matrikula 4736 G, 5657 G no  6096 G.

     

    Nuneé mós iha funsionarius públiku balun mos involve iha aktividade kamapaña.Tuir monitor sira nia hare no observasaun motorizadas no kareta Estadu nian barak maka utilize husi simpatizantes no militantes sira husi partidu seluk tanba kareta no motor balun ema neébé uza hasai tiha xapa motor no kareta hirak neé.

    Iha Distritu Aileu wainhira ekipa monitor komfirma ho parte PNTL Distritu Aileu iha loron 6 Juñu 2012, Komandante PNTL Sr. Ludgerio Lay esklarese katak, iha partidu balun wainhira hala,o kampaña iha Distritu Aileu vila uza duni Patrimoniu do Estadu hanesan kareta ne,ebe la uza xapa matrikula ho total 6 no sira diskunfia katak kareta ne,e parese kareta estadu nian, maibé PNTL Distritu Aileu labele halo intervensaun, tanba sira labele tama iha atividade kampaña nia laran.

    Nuneé mós kampaña Partidu CNRT nian iha loron 7 Junu 2012 iha Sub Distritu Atabae neébé ho modelu dialogu neé partisipa mós husi funsionariu públiku sira hanesan funsinariu husi  Ministeriu Edukasaun  Professor nain 1 no funsionariu husi Ministeriu Finansas (Servisu iha Alfandega ema nain 1). PDHJ sei husu lista husi Comissão Fúnção Publiku hodi hatene kona-ba funsionariu publiku hirak ne’ebe husu licensa la ho vensimentu, hodi nune’e PDHJ bele cek antes rekomenda ba  Comissão Função Publico hodi foti medidas.

    Alem de neé aktividade kampaña husi partido FRETILIN ba dala 2 iha Sub-Distritu Remexio Distrito Aileu maske militants sira la dun barak maibé kampaña laó ho diák.

    Iha  sesaun husu no hatan ne’e mosu konflitu ki’ik ida ne’ebe kordenador partidu Fretilin Remexio halo atake ida ba katuas ida ne’ebe iha kondisaun lanu. Tuir  ekipa monitorizasaun no hare katak hahalok ne’e ladun di’ak ne’ebe halo hanesan intimidasaun atu komunnidade seluk labele husu perguntas.

    Entertantu kampaña partidu PSD neébé hala’o iha suko Turisai ho modelu kampaña dor to dor neé  iha jurkam husi partidu PSD hato’o programa partidu nian neébe mosu liafun provokator, Diskriminativu ba lider partidu seluk no halo intimidasaun hodi dehan ba komunidade katak bainhira komunidade sira la vota ba PSD sira-nia dokumentu veteran nian sei la asina atu hetan pensaun. Monitor sira haktuir Jurkam PSD neé nia lia fuan katak “ imi kuandu la vota ba PSD imi nia dokumentus veteranus ami sei la asina ou aprova” . Tuir Monitor sira nia haree ida ne’e hanesan kampaña atu obriga ema tama iha partidu PSD nuneé mós Jurkam PSD uja liu poder ne’ebe sira iha atu fo presaun ba komunidade tanba jurkam refere Veteranus bo’ot ida nebe mos bele foti desizaun ba asina ka la asina dokumentus veteranus nian.

     

     

    Presiza Informasaun Kontaktu Lady Ximenes, ho númiru telemovel 7304260 ou Jóse Tefa ho númiru 735 1412 ou 3331071