• By On 26 April 2024 In Uncategorized

    PDHJ-APFTL Asina Nota Entendimentu Ho Durasaun Fulan 2, Kona-ba Estudu Persepsaun Públiku Nian Relasiona ho Ezistensia PDHJ Nian Durante Tinan 20
    Dili: Loron, 23 Abril 2024, Provedoria dos Direitos Humanos e Justiça (PDHJ) liu husi Provedor de Direitos Humanos e Justiça, Sr. Virgílio da Silva Guterres “Lamukan” ho Alumni Parlamentu Foinsae Timor-Leste (APFTL) liu husi nia Prezidente, Sr. Zaulino Gomes da Silva, asina Nota entendimentu ida ho durasaun fulan 2 (rua) kona-ba, estudu persepsaun públiku ba ezistensia PDHJ.
    Entretantu Nota Entendimentu ne’e selebra atu implementa programa Planu Estratéjiku PDHJ 2024-2028 nian kona-ba Estudu Persepsaun Públiku nian relasiona ho ezistensia no servisu PDHJ nian durante tinan 20, liu husi rekolla dadus tinan ida dala ida ba iha munisipiu hotu inklui RAEOA. Alvu ba respondente ho total 5,141 (rihun lima atus ida hatnulu resin ida) ekivale amostra 1% akumulativa husi populasaun 612,557.00 ho idade entre 20 to’o 59.
    Nota entendimentu ne’e parte rua selebra iha Sala Biblioteca PDHJ, Caicoli. Iha ambitu akordu entre PDHJ no UNDP kona-ba Fundo Doasaun husi UNDP hodi hala’o peskiza persepsaun públiku ba tinan 20 ezistensia PDHJ.
    Serimonia ne’e partisipa mós husi Provedor Adjunto Boa Governasaun, Sr. Rigoberto Monteiro, Provedora Adjunta Direitos Humanos, Sra. Maria Marilia X. C. de O. da Costa, Chefe Gabinete, Sr. Silvino Saldanha Pereira, Chefe Unidade Asistensia Juridika, Administrativa e Pesquisa, Sra. Filomena Dias, ho nia Ofisial sira inklui membru Alumni Parlamentu Foin sira.