• PDHJ- DT Same Aprezenta Preukupasaun Komunidades Ba Autoridades públikus iha Munisipiu Aileu, Ainaro no Manufahi

    Same : Provedoria dos Diretos Humanos e Justiça (PDHJ) Delegasaun Territorial Same realiza workshop nivel rejional durante loron 1, hamutuk ho autoridades públikus sira husi Munisipiu Aileu, Ainaro no Munisipiu Manufahi hodi hato’o fila fali preukupasaun komunidades sira nian wainhira PDHJ-DT Same realiza atividade sosializasaun knár Provedoria nian iha nivel Suco.

    Diretor Delegasaun Territoria Same, Sr. Martinho Pereira hateten katak, objetivu husi workshop ne’e atu aprezentasaun rezultadu sosializasaun kona-ba prekupasaun komunidade nian relasiona ho situasaun ne’ebé sira hasoru lor-loron, no mos atu inoforma ba autoridade nivel Munisipiu sira kona-ba problema hirak ne’ebé maka sira nia komunidade sira hasoru, no mos atu informa ba autoridade sira atu hare, sinte no konsiente katak sei iha problema barak maka sedauk rezolve, ho nune’e autoridade sira bele defini politika programa ne’ebé maka sira atu trasa iha futuru.

    Depois aprezentasaun preukupasaun husi komunidades sira, hetan apresiasaun singnifikante husi autoridade Munisipiu no kada responsavel linhas Ministerias no Komandante Komando Polisia Distritu sira, ida-idak responde tuir nia knár no kompetensia.

    Aleinde ne’e mos, Diretor esplika katak objetivu seluk liga ho servisu PDHJ nian katak Provedoria sai hanesan parseiru servisu ne’ebé bele ajuda no apoiu autoridade sira defini no hare situasaun komunidade nian ho konjunta.

    Diretor esplika mos katak, programa Provedoria nian liu husi sosializasaun ba Suco sai hanesan instrumentu no sasukat ba autoridade sira oinsa servisu ne’ebé besik liu komunidade no bele sinte hatene no rona rasik komunidade sira nia preokupasaun, nomos ajuda autoridade sira bele servisu hamutuk ka hetan partisipasaun masimu husi komunidade, nune’e bele lori dezenvolvimentu ne’ebé sustentabel.

    Prinsipiu prinsipal husi programa workshop ne’e, atu lideransa komunitaria sira, sosiesiedade Sivil bele rona direita husi autoridade kompetente relasiona ho preokupasaun husi komunidade sira nia vizasaun, misaun, programa no atividade no oinsa sira bele kria mekanismu atu bele iha planu ne’ebé diak ba rezolve problema hirak ne’ebé komunidade sira hasoru.

    Iha workshop ne’e, kada linhas Ministerias responde direta preokupasaun hirak ne’ebé komunidade sira hasoru. Ezemplu, PNTL liga atuasaun memberu PNTL iha terenu, mekanismu prosedural atuasaun polisial ida ke lolos no profesional ne’e mak oinsa liga ho lei sira. Preokupasaun ne’e Komandante Polisia Distritu Manufahi ne’ebé mos hanesan asesor Juridiku ne’ebé mos halao misaun iha Kosovo esplika klean kona-ba knár no servisu polisial.

    Atividade workshop ne’e realiza iha Munisipiu Aileu no hetan partisipasaun masimu husi autoridade nivel Munisipiu tantu husi Munisipiu Aileu, Munisipiu Ainaro no Munisipiu Manufahi, alende ne’e mos hetan partisipasaun husi Komandante Polisia Distritu Aileu, Komandante Polisia Distritu Ainaro no Komandante Polisia Distritu Manufahi.