PDHJ entrega RA 2020 ba Prezidente PN
Dili : Loron, 23 Junho 2021, Provedora dos Direitos Humanos e Justiça, Jesuina Maria Ferreira Gomes, MPA, akompaña husi Provedor Adjuntu Boa Governação, Sr. José Telo Soares Cristovão no Provedora Adjunta Direitus Umanus, Sra. Benicia Eriana Magno, inklui Xefe Gabinete, Sr. Silvino Saldanha Pereira, aprejenta relatoriu annual 2020 ba Prezidente Parlamentu Nacional, Dr. Aniceto Longuinhos Guterres Lopes. Aprejentasaun ne’e realija iha sala audiensia Gabinete Prezidente Parlamentu nasional.
Provedora haktuir katak, aprejentasaun relatoriu ne’e rasik realiza bazeia ba estatutu Provedor lei Nu.7/2004 artigu 34 ho 46 ne’ebé haktuir katak, tinan-tinan antes loron 30 Juñu Provedor tenke entrega relatoriu annual ba iha Parlamentu nacional hodi aprejenta atividades estatistika keixa ho kazu nian ne’ebe hala’o husi Janeiro to’o Dezembro ba iha Prezidente Parlamentu nasional.
“Tanba ida ne’e mak ami kumpri ami nia dever, kumpri ami nia mandatu hodi mai entrega no esplika relatoriu annual 2020 nia konteudu ba iha Prezidente Parlamentu Nacional,” hateten, Provedora, Jesuina Maria Ferreira Gomes, iha nia intervista ho Jornalista nacional sira iha Parlamentu nacional.
Entretantu, Relatoriu annual 2020 ne’e iha nia kapitulu 7 ho nia area importante 4 maka hanesan: 1. Formasaun no treinamentu iha area direitus Umanus no Boa Governasaun, 2.Keixa no investigasaun iha area Direitus Umanus no Boa Governasaun, 3.Fiskalizasaun no Rekomendasaun ba instituisaun estadu sira, 4. Jestaun institusional inklui mos dezafiu no rekomendasaun ne’ebe PDHJ hato’o ba iha Parlamentu nacional nomos ba iha entidades guvernu sira nian.
Aleinde ne’e, Provedora mós husu atu Prezidente Parlamentu tau iha ajenda orariu ba aprejentasaun relatoriu anual PDHJ ni’an iha plenaria Parlamentu nasional.
Hafoin rona tiha esplikasaun husi Provedora Prezidente Parlamentu Nacional haktuir katak, Parlamentu durante ne’e akompaña hela servisu PDHJ nian iha estadu emerjensia nia laran no relatoriu sira ne’ebe mak Prezidente Parlamentu nacional simu sempre kanaliza tutuir ba iha deputadu sira atu hare.
Prezidente ne’e mós haktuir katak, kona ba aprejentasaun Relatoriu annual iha plenaria laos urjente maibe, nia parte sei tenta no buka meius para enkaisa antes tama ba resesu.