PDHJ Entrega Relatoriu Monitorizasaun Eleisaun Prezidensial Ba Ministério Alvu
Dili- Provedória dos Direitos Humanos e Justiça (PDHJ) hanesan instituisaun Nasional Direitus Umanus ne’ebé independente mak iha kna’ar atu prevene mal administrasaun, proteje no promove direitus humanus no liberdade fundamental sidadaun ida-idak nian iha teritóriu nasional tomak. Nuneé bazeia ba artigu 5o Estatutu Provedoria nian, Provedór Direitus Humanus no Justisa iha mandatu hola inisiativa atu monitoriza kampaña kandidatura Prezidente Repúblika periodu 2017-2022.
Tanba ne’e, iha loron 20 fulan Abril 2017, PDHJ aprezenta no entrega relatoriu rezultadu monitorizasaun ba atividade kampaña no eleisaun Prezidensial 2017-2022 ba Ministério alvu sira maka hanesan Ministério Administrasaun Estatal (MAE), Komisaun Funsaun Públika, Komisaun Nasional Eleisaun, STAE, Ministério Públiku no PNTL, hodi hola medidas ba aktu violasaun direitus umanus no boa governasaun ne’ebé rekomenda iha relatoriu nia laran.
Provedor Dr. Silverio Pinto Baptista iha nia intervensaun hateten katak, iha instituisuan 2 mak simu relatoriu rezultadu monitorizasun ho dadus kompletu mak hanesan Komisaun Funsaun Publika no Ministério Públiku, tanba iha rezultadu hatudu katak iha funsionariu públiku balun partisipa iha atividade kampaña maibe la iha karta lisensa sem vensimentu ba KFP, no mos relatoriu ida ho dadus haruka ba Ministério Públiku hodi prosesu tuir lei.
Provedór sente orgullu no apresia servisu governu liu husi órgaun eleitoral ne’ebé susesu ho komunidade ninia antusiasmu hodi partisipa livremente iha festa demokratiku ne’ebé direta no segredu, ita konsege hili Prezidente Republika ida hanesan simbolu unidade nasional hodi rezulta vitoria foun iha istoria Timor Leste ninia ajenda. Ita konsege ultrapasa eleisaun dala hat ona ho susesu maske hasoru dezafiu oioin. Esforsu no susesu barak mak governu hala’o ona iha primeiru governu too sestu governu konstitusional.
Provedór hein katak relatóriu monitorizasaun neé, núdar kontribuisaun kiik no ajuda fo solusaun iha parte balu iha prosesu preparasaun ba organiza eleisaun sira tuir mai ho edukasaun votantes ne’ebé too areas remotas, eleisaun bazeia ba leis eleitoral ne’ebé mak iha ho sidadaun nia interpretasaun ida deit ba leis no halo revizaun ba leis eleitoral ne’ebé mak dalaruma la refleta ka hamosu interpretasaun ne’ebé mak luan ka nakloke liu.