• pdhj halo meza redonda ho membros governu kona-ba direitu ema nian iha fatin detensaun dili

    Data 15-11-2007

    Provedoria dos Direitos Humanos e Justiça (PDHJ) liu husi Divizaun Direitos Humanos iha loron 16 Novembro sei halo meza redonda hodi halo diskusaun ho membros governu kona-ba direitu ema nian iha fatin detensaun iha Hotel Timor.

    “Iha meza redonda ne’e PDHJ sei hato’o rezultado monitorizasaun ba membros governu  kompetente kona-ba direitu ema nian iha fatin detensaun Dili, ne’ebé PDHJ hala’o ona monitorizasaun  durante fulan sia (9) nia laran hahu husi Fevereiru to’o Outubro 2007. Gabineti Provedór halo ona analize ba iha aréa sira ne’ebé mak sai nu’udar preokupasaun detido nian relasiona ba garantia direitos humanos husi ema nian iha detensaun” hateten Adjunto Provedór Dr. Silverio Pinto Baptista.    

     Dr. Silverio hatutan tan “liu husi meza redonda ne’e, Provedoria espera katak sei iha oportunidade atu hametin kolaborasaun entre instituisaun ne’ebé mak iha knaar atu haree direitu ema nian durante detensaun”.

     Estrutura ba meza redonda ne’e autoridades ne’ebé relevante sei tur hamutuk no halo diskusaun kona-ba mekanizmo atu hadía kondisaun ema sira iha detensaun tuir problema ne’ebé Provedoria identifika ona.  Liu husi meza redonda ne’e membros governu sira sei hato’o sira-nia intervensaun hanesan Dra. Lucia Lobato, Ministra Justiça, dr. Nelson Martins, Ministru Saúde, Dr. Fransisco Guterres, Sekretariu de Estadu Segurança, Dr. Ivo Valente Vise Prokuradór Jeral RDTL, Sr. Afonso de Jesus, Komadante Interino PNTL, Dr. Sergio Hornai, Kordenadór Defensoria Públika, Dr. Jose Pedro Camoes Prezidente AATL no Sr. Jose Luis Oliveira, Direitur Asosiasaun HAK.

    Tuir Provedór nia haree rezultado monitorizasaun ne’e sei la fó de’it rekomendasaun ba instituisaun relevante maibé liu husi meza redonda ne’e bele halo diálogu ho autoridade relevante atu hanoin hamutuk kona-ba estratéjia ba implementasaun rekomendasaun husi Provedór.

    Partisipa iha meza redonda ne’e ONG ne’ebé hala’o monitorizasaun ba fatin detensaun, PNTL, Defensoria Públiku, Assosiasaun Advogado Timor-Leste (AATL) ONG Nasionál no Internasionál, Nasoens Unidas (UNMIT, UNDP no UNICEF) korpu diplomátika no membros Konshelo Konsultivo PDHJ nian. Fasilitadór iha meza redonda ne’e Dr. Silverio Pinto Bapstita, Adjunto Provedór.

    Rejultado ne’ebé iha Provedór sei hatama iha ninia relatório inisial kona-ba monitorizasaun iha fatin detensaun Dili, kona-ba meza redonda, inklui akordu, politika no estratéjia husi autoridade relevante atu implementa iha futuru.

    Adjunto Provedór hateten katak “Provedór sei espera katak ho meza redonda ne’e Repúblika Demokratika de Timor-Leste (RDTL) sei iha instrumentu ida importante atu bele reforsa Direitos Humanos iha detensaun”.

    Bazeia ba Artigu 27 Lei-Inan Timor-Leste nian, ne’ebé prevee ona kona-ba ezisténsia Provedór Direitos Humanos no Justiça nu’udar órgaun indepedente ida ne’ebé iha knaar hodi promove no protéje Direitos Humanos iha Nasaun Timor-leste.

    Nune’e mós tuir Lei Provedor Direitos Humanos e Justiça No. 7/2004 artigu 3 pontu 1 hateten katak “Provedor Direitus Humanus e Justiça iha dever atu hala’o ninia funsaun sira iha ámbitu atividade sira entidade públiku nian, partikularmente Governu nian, PNTL, Servisu Prizaun no F-FDTL”.

     resiza informasaun Kontaktu

    Lady Ximenes

    Informasaun & Relasaun Públika PDHJ

    Telemovel 726 1843 ou 333 1071