• PDHJ Halo Monitorizasaun Ba Atividade Kampaña Kandidatus Prezidensial 2017

    Dili – Relasiona ho atividade kampaña husi kandidatus prezidensial ne’ebé hahu hala’o ona iha loron 3 Marsu 2017, Provedoria dos Direitos Humanos e Justiça (PDHJ) nuúdar Instituisaun Independente estadu nian haruka ona nia ekipa ba Munisipiu 12 no RAEOA hodi halo monitorizasaun ba atividade refere ne’ebé hala’o husi kandidatus prezidensial sira iha territoriu laran. Tanba ne’e iha loron 6 Marsu 2017, Provedor Interino Dr. Horacio de Almeida, ne’ebé akompaña husi Xefe Gabinete Provedor, Diretora Rekursus Humanus, Diretor Nasional Assistensia Públika no ofisial sira hodi realiza konferensia ba imprensa ho objetivu atu hateten ba públiku katak, PDHJ nia ekipa monitorizasaun oras ne’e dadaun hala’o hela atividade monitorizasaun ba kampaña kandidatus prezidensial hodi hare kona-ba isu violasaun diretus umanus no boa governasaun antes, durante no depois eleisaun prezidensial.
    Provedor Interino esplika katak, ekipa monitorizasaun husi PDHJ atu hare liu kona-ba aspetu violasaun direitus umanus no boa governasaun, portantu iha aspetu direitus umnaus, PDHJ hare ba sidadaun sira nia direitu atu halao sira nia direitu politiku ba iha votasaun no kampaña eleitoral nian. No ba aspetu boa governasaun hare kona-ba oinsa atu halo prevensaun ba iha akontesementu ne’ebé ke iha. Ezemplu hanesan uza patrimoniu estadu ou funsionariu públiku ne’ebé durante tempu kampaña sira marka prezensa iha ne’eba maibe sira la foti lisensa. Entaun kuandu la foti lisensa signifika sira tenki hetan sansaun ne’ebé regula husi estatutu funsaun públika.
    Kona-ba rezultadu husi ekipa monitorizasaun ba atividades kampaña husi kandidatus prezidente, Provedor Interino informa katak, depois de eleisaun PDHJ sei halo relatoriu no rekomendasaun haruka ba Ministério ka orgaun responsavel sira hodi toma medidas ba aktus ruma ne’ebé rekomenda iha relatoriu monitorizasaun ne’e. Ezemplu ita nia maluk sira husi CNE, STAE ninian serbisu diak ka lae iha buat balun falta karik prontu rekomenda ba sira hodi hadia iha futuru mai.
    Ofisial monitorizasaun hamutuk nain 63 ne’e hala’o sira nia kna’ar bazeia ba estatutu PDHJ ne’ebé iha, tanba PDHJ hanesan instituisaun estadu ne’ebé independente no hala’o nia kna’ar tuir estatutu ne’ebé iha. No mos ofisial monitorizasaun hirak ne’e, tuir ona formasaun kona-ba oinsa atu halo monitorizasaun ba iha festa demokrasia ne’ebé akontese iha nasaun laran. Atividade monitorizasaun hahu husi loron 3 fulan Marsu no sei remata iha loron 23 fulan Marsu 2017.