PDHJ halo Sosializasaun Kna’ar PDHJ ba Funsionariu Públiku MOPTK

Dili- Provedoria dos Direitus Humanus e Justiça liu husi Diresaun Boa-Governasaun, Departamentu Promosaun no Edukasun, iha loron 16 Marsu 2015, halo sesaun sosializasaun kona-ba kna’ar PDHJ ba Lideransa no Funsionariu Públiku Ministerio Obras Públiku Transporte no Komunikasaun (MOPTK) iha Salaun Ministerio Obras Públiku Transporte no Komunikasaun Caicoli Dili.
Provedora Interina Sra. Jesuina M.F. Gomes, MPA iha sesaun abertura hateten, objetivu husi aktividade ne’e atu fahe informasaun kona-ba prinsipiu baziku boa governasaun. Sr. Jesuina haktuir katak, tuir lei Instituisaun PDHJ iha kna’ar importante ida atu tau matan ba servisu funsionariu publiku hotu nune’e bainhira iha buat balun ne’ebe lao iha administrasaun publiku la tuir lei ne’ebe iha presiza kolabora hamutuk hodi hadia.
Sra. Jesuina enkoraja nafatin ba ema hotu inklui funsionario tomak katak, odamatan PDHJ nakloke ba sidadaun tomak inklui mos funsionarius públiku sira atu hato’o sira keixa, bainhira sente katak iha entidades balun viola sira-nia direitu.
Iha sesaun sosializasaun Director Direitus Humanus, Sr. Valerio Magno Ximenes esplika kona-ba prinsipius direitus humanus, Xefi Departamentu Simu Keixa Sra. Josefa Soares esplika kona-ba dalan oinsa hato’o keixa ba PDHJ no Ofisial Hare Tuir Rekomendasun, Sra. Francelina Tilman esplika konaba prosesu oinsa hare tuir rekomendasaun sira ne’ebé PDHJ rekomenda ona ba Ministerio kompetentes.
Aktividade sosializasaun ne’e realiza tanba servisu hamutuk entre PDHJ no Ministerio Obras Públiku Transporte no Komunikasaun (MOPTK).