• pdhj hasa’e kapasidade funsionarius ba monitorizasaun direitos umanus iha eleisaun

    Date :   6-02-2012

    Dili – Funsionariu Provedoria dos Direitos Humanus no Justisa (PDHJ) no reprezentantes husi Organizasaun Naun Governamental (ONG) ne’ebe servisu iha area direitus umanus partisipa treinamentu kona-ba monitorizasaun ba eleisaun presidensial no parlamentar durante loron 3 hahu husi loron 7 to’o 9 Fevereiru 2012 iha Hotel Novo Horizonte, Metiaut-Dili.

    Objetivu husi treinamentu ne’e, atu hasa’e koñesimentu iha area direitus umanus liu-liu atu bele kompriende lei nasional maka relevante ho eleisaun. Alein ida neé atu bele  halo advokasia ba kazus indikasaun violasaun karik mosu iha kampaña no eleisaun nian laran.

    Provedor de Direitus Humanus no Justisa (PDHJ) Dr. Sebastião Dias Ximenes iha sesaun abertura ba programa ne’e husu ba partisipantes sira atu rona no simu materia ne’ebe treinador esplika  ho diak,  atu nune’e bele sai hanesan bukae ida bainhira atu fahe fali informasaun  ba ema seluk ne’ebe atu lao hamutuk iha monitoring ba aktividades eleisaun jeral presidensial no parlamentar.

    Provedor ho esperansa katak, ho materia ne’ebe simu bele sai hanesan referensia bainhira atu fo fali treinamentu ba ema seluk. Nomos bainhira simu ona materia husi treinador,  imi ho imi (partisipantes red) bele fahe fali informasaun ba malu, atu nune’e bele kompleta informasaun bainhira atu esplika fali materia ne’e ba ema seluk.

    “Ho materia ne’ebe treinador esplika, Provedor husu nafatin ba partisipantes sira atu rona ho atensaun, hodi nune’e iha materia balun ne’ebe seidauk hatene ou komprende lolos bele husu fila fali ba treinador bele esplika klaru liu tan, atu nune’e bainhira remata treinamentu ne’e bele lori netik buat ruma ne’ebe fo vantagen ba ita nia a’an rasik nomos ba instituisaun”, espera Provedor.

    Treinador ba treinamentu neé maka Sra. Ruth Hugo ne’ebe iha esperiensia maka’as ba area monitorizasaun iha eleisaun, PDHJ konsidera treinamentu ne’e importante tebes liu-liu ba ofisial sira mak servisu iha area direitus umanus, atu nune’e sira iha koñesimentu diak kona-ba monitorizasaun liu-liu iha eleisaun presidensial no parlamentar, hateten Provedor.

    Ho treinamentu ne’ebe ho tempu limitadu tebes maibe espera katak bele aumenta ofisial sira ne’ebe servisu iha area direitus umanus atu apoiu servisu wainhira halo monitorizasaun ba eleisaun presidensial no parlametar tinan 2012 iha rai laran.

    Treinamentu ne’e realiza tanba hetan apoiu husi projetu UNDP/OHCHR ba PDHJ kona-ba hasa’e kapasidade ba Provedoria Direitos Humanos no Justisa (PDHJ).

    Bazeia ba Konstituisaun RDTL Artigu 27, Provedor dos Direitos Humanos e Justiça nu’udar órgaun indepedente ida iha knaar atu haree no buka hatán sidadaun sira-nia problema sakar podér públiku, atu haree loloos hahalok sira ne’ebé tuir lei no halo prevensaun no hahú prosesu tomak hodi haburas fali Justiça.

     

    Presiza Informasaun Kontaktu

    Lady Ximenes, Telemovel 7304260

    ou Jose Tefa 735 1412 ou 3331071   (Relasaun Públika PDHJ)