pdhj hato’o relatoriu anual ba parlamentu nasional
Date ; 08-07-2011
Dili– Provedor de Direitos Humanos e Justiça (PDHJ) iha loron 30 Juñu 2011 hato’o tiha ona relatoriu anual ba Prezidente Parlamentu Nasionál iha uma fukun Parlamentu Nasional.
Bazeia ba lei numiru 7/2004 estatutu do Provedor de Direitos Humanos e Justiça (PDHJ) artigu 46 katak, iha loron 30 Fulan-Juñu tinan-tinan Provedór Direitos Humanos no Justiça sei hatada relatoriu ida kompletu kona-ba ninia atividades no inisiativas inklui estatístika kona-ba kazus no rezultadu sira ne’ebé hetan durante tinan ida nia laran haktuir kalendàriu sivíl nian ne’ebé remata iha loron 31 fulan Dezembru ba Parlamento Nasional.
“Relatoriu tinan ida ne’e nu’udar relatoriu ba dala lima nian ne’ebe PDHJ hato’o ba PN. Liu husi relatoriu ne’e Provedoria dos Direitos Humanos e Justiça hato’o nia atividades PDHJ nian hahu husi Janeiru 2010 to’o Dezembru 2010. Atividades hirak ne’e hanesan edukasaun no promosaun, treinamentu, monitorizasaun, investigasaun no hato’o rekomendasaun ba orgauns kompetentes, hateten Provedor Dr. Sebastião Dias Ximenes”.
Liu husi relatoriu anual ba dala ida neé Provedor mós hatoó nia agradesimentu ba membros Parlamentu tomak ba fiar no konfiansa neébé depozita ba Provedor hodi re-eleito fila fali ba iha mandatu ba segundu periodu tinan 4 nian, nuneé iha loron 14 fulan Abril 2010 Prezidente Parlamentu Nasional fó tomada de pose ba Provedor no Adjuntu sira.
Maske rekursus humanus no finanseiru seidauk sufisiente. Provedor hatoó katak, PDHJ halo esforsu nafatin atu hari’i kapasidade iha instituisaun laran atu bele hala’o servisu ho di’ak hodi responde no satisfás povu nian nesesidade no interese. Relatoriu ne’e mós sei fó sai ba públiku atu nune’e públiku bele akompana servisu Provedoria nian ne’ebé hala’o durante tinan 2010 hatutan Dr. Sebastião Dias Ximenes”.
Iha Relatoriu ne’e Provedor hato’o rekomendasaun balun ba Parlamentu Nasionál no Governo ho objetivu atu oinsa reforsa knaar PDHJ nian iha futuru hanesan orgaun ne’ebé indepedente. Alein ida ne’e, relatoriu ba dala ida ne’e Provedor hameno ba Parlamentu Nasionál no Governu atu bele implementa rekomendasaun ne’ebé mak PDHJ hato’o ona iha tinan 2006 to’o 2009 liu husi nia relatoriu anual maibé balun seidauk implementa to’o agora.
Provedor hein katak rekomendasaun ne’ebé hato’o iha Relatóriu annual tinan 2010 ne’e, Parlamentu Nasionál no Governu bele implementa ho seriedade.
Relatoriu anual ne’ebé hato’o ba PN iha lian Tetum maibé sei tradus mós ba lian Portugues no Ingles atu fahe ba instituisaun governu nian, instituisaun Estado, organizasaun internasionál, NGO Nasionál no internasional.
Presiza Informasaun
Kontaktu Lady Ximenes, Númeru Tel : 730 4260
ou Jose Tefa Númeru Tel : 735 1412 ou 3331071 Relasaun Públika PDHJ