PDHJ Lansa Relatoriu Monitorizasaun Ba Sela Detensaun, Prizaun no Programa Merendah Eskolar
Dili : Loron 8 Novembru 2017, Provedoria Dos Diretos Humanos E Justisa (PDHJ) hala’o enkontru publiku hodi entrega relatoriu rezultadu monitorizasaun ba iha isu tematiku tolu mak hanesan, Monitorizasaun ba Sela Detensaun Polisia iha territoria laran, Monitorizasaun ba Prizaun Becora, Gleno no Suai no Monitorizasaun ba Programa Merenda Eskolar iha tinan 2017.
Provedoria hanesan instuisaun estadu independente ida ne’ebé hari’i ho objetivu atu haree ba iha violasaun direitu umanus no boa governasaun ne’ebé mak lao iha Timor-Leste tanba, ne’e ho mandatu ne’ebé iha Provedoria tinan-tinan liu husi Diresaun Fiskalizasaun sempre iha planu halo monitorizasaun ba isu tematiku no isu urjensia iha teritoriu tomak inklui isu tolu iha leten, no tuir planu programa ne’e sei realiza tan iha tinan oin.
Adjunta Provedor ba área Governasaun Di’ak, Jesuina M. F. Gomes, MPA liu husi iha abertura hateten, razaun halo monitorizasaun ba iha Programa Merendah Eskolar tanba, programa ne’e núdar isu central ou isu nasionais no tama iha mandatu PDHJ ni’an.
Entertantu razaun halo monitorizasaun ba iha Prizaun no Sela Detensaun Polisia sira iha territoria laran, tanba parte rua ne’e sai núdar asuntu ida ne’ebé importante iha mundu, tamba prizioneiru sira sai hanesan populasaun ne’ebé vulneravel liu, no fasil atu infrenta violasaun direitus umanus iha prizaun no ba iha sela detensaun polisia rasik sai núdar asuntu ida ne’ebé importante iha mundu, hodi asegura no prevene ba asaun tortura no tratamentu a’at ba detidu sira atu la hetan violasaun direitus umanus.
Tanba ne’e, ho monitorizasaun ne’ebé mak PDHJ halo no publika iha relatoriu ho nia rekomendasaun sira ba iha Ministériu relevantes hanesan, Ministeriu ESTATAL no Edukasaun ne’ebé hare liu ba iha Programa Merendah Eskolar, Ministériu Justisa ne’ebé hare liu ba iha rekomendasaun sira foka ho prizaun inklui Polisia ne’ebé sei foka ba iha rekomendasaun kona-ba sela detensaun ni’an.
No husi rekomendasaun ne’ebé mak hato’o iha relatoriu nia laran, Adjunta Provedor husu ba instituisaun relevantes sira atu konsidera no responde hafoin loron 60 nia laran.