PDHJ, MDS, F-FDTL no UADU realiza treinamentu Direitus Umanus ba membrus F-FDTL Komponente Naval Hera.
Hera : Durante loron 5 hahu husi loron 19 to’o 23 Fevereiru 2018, Provedoria dos Direitos Humanos e Justiça (PDHJ) hamutuk ho Ministério Defesa no Seguransa (MDS), Falintil Forsa Defesa Timor-Leste (F-FDTL) no Unidade Assesoria Direitsu Umanus (UADU) iha Timor-Leste, realiza treinamentu direitus umanus no kna’ar F-FDTL ba Ofisial F-FDTL Komponente Naval Hera.
Iha abertura ba atividade treinamentu ne’e, Adjunto Provedor ba área Direitus Umanus, Dr. Horacio de Almeida hateten katak objetivu husi treinamentu ne’e mak atu hasa’e koñesimentu no kapasidade membrus F-FDTL sira nian kona-ba valor no prinsipiu direitus umanus hodi hala’o kna’ar tuir lei nasional, lei organiku F-FDTL, regulamentu disiplina militar, lei juridiku uza forsa no lei internasional direitus umanus no lei sira seluk.
Adjunto reforsa tan katak, objetivu seluk mak, atu hasa’e koñesimentu membru F-FDTL sira nian hodi redus asaun violasaun direitus umanus relasiona ba atuasaun no uza forsa iha terenu, nune’e bele hamenus keixa husi komunidade ba PDHJ no entidades seluk.
Adjunto dehan, PDHJ dezempeña nia funsaun sira ámbitu atividade sira entidades públiku nian, partikularmente governu nian, PNTL, F-FDTL no servisu Prizional sira.
Iha oportunidade furak, Adjunto informa ba partisipantes sira katak, Instituisaun PDHJ, F-FDTL, Ministério Defesa no Seguransa (MDS) no Unidade Asesoria Direitus Umanus Timor-Leste (UADU-ONU) hala’o ona konkordansia no kompromisiu iha tinan hirak liu ba kotuk ho objetivu atu dezenvolve manual treinamentu direitus umanus ba F-FDTL. No iha tinan kotuk 2017 finaliza no lansa duni manual ne’e iha Ministério Defesa no Seguransa-Dili no iha tinan 2018 uteliza manual ne’e hodi realiza treinamentu ba membrus F-FDTL iha territoria laran.
Iha fatin hanesan, Ministro Defesa no Seguransa, José Agustinho Segueira ‘Somotxo’, husu ba partisipantes sira atu aproveita oportunidade furak ne’e, hodi tuir treinamentu no simu materia husi fasilitador sira atu nune’e bele hasa’e koñesimentu kona-ba direitus umanus liga liu ba kna’ar F-FDTL nian, atu nune’e iha futuru la bele monu ba kazu violasaun direitus umanus.
Partisipantes ne’ebe tuir treinamentu ne’e hamutuk ema nain 23 ne’ebé kompostu husi mane 21 no feto 2. Tenente nain 3, Primeiro sargento nain 2, segundu sargentu nain 16 no Cabo nain 2.
Atividade treinamentu ne’e, abertura husi Provedor Adjunto ba área Direitus Umanus Dr. Horacio de Almeida, Ministro Defesa no Seguransa, Sr. José Agustinho Segueira ‘Somotxo’, Assesora Direitus Umanus ONU-TL, Sra. Anjet Lanting, 10 Tenente Juliao da Silva Pinto Reprezentante Komandante Naval Hera.