PDHJ-MS-IJE Fo Treinamentu ba Funsionáriu MS Manufahi

Same – Provedoria Direitos Humanos no Justiça (PDHJ), Diresaun Boa Governasaun, Departementu Promosaun no Edukasaun, servisu hamutuk ho Gabinete Inspesaun no Fiskalizaun Auditorial Ministério da Saúde (GIFA-MS) no Inspesaun Gerál do Estado (IGE), iha loron 7 to’o 9 Outubro 2015 realiza treinamentu ba funsionáriu, Kargus, Diresaun Xefias no Profisinais Saúde Ministério da Saúde iha Munisípiu Manufahi. Tema husi treinamentu hamutuk maka, ”Hasa’e Koñesimentu Funsionalismu Públiku Iha area Saúde hodi Promove Governasaun Diak”.

Inspetór Jerál Estado (IJE) Sr. Francisco de Carvalho iha abertura ba treinamentu ne’e hateten, hare ba situasaun abuzu podér, mal administrasaun, ne’ebé akontese ona iha instituisaun estadu nian, mak PDHJ-MS no IJE liu husi asina akordu ida hodi fó treinamentu ba funsionáriu públiku tomak iha governu nia laran, liu-liu iha Ministério da Saúde atu la bele komete buat ne’ebé lei la fo dalan atu halo nomos hanesan meius prevensaun, nune’e labele mosu hahalok iregularidade iha future.

Francisco hatutan, iha instituisaun balu mosu ona problema, no hatan ona iha Komisaun Anti Korrupsaun (KAK), Provedoria Direitos Humanos no Justiça (PDHJ) no Komisaun Funsaun Públika (KFP).

Iha fatin hanesan, Diretór Nasional servisu Inspesaun Jerál Estadu (IJE) Sr. Marcos Sarmento hateten, treinamentu ne’e, bazeia ba akordu entre instituisaun tolu nian iha fulan hirak liu ba atu realiza treinamentu ba funsionáriu Saúde nomós instituisaun estadu nian partense ba administrasaun públiku sira, tamba durante ne’e iha instituisaun balu utiliza sasan estadu nian la tuir regras.

Depois treinamentu, Diretór Delegasaun Teritorial PDHJ Same, Sr. Antoninho da Silva ne’ebé reprezenta instituisaun tolu afirma ba partisipante sira katak, kapasitasaun ne’ebé sira hetan durante loron tolu, atu ba inplemeta iha sira nia servisu fatin, tamba hanesan ema humanu bele tolera malu maibe kuandu monu ba sala lei la tolera.